DILI, 24 setembru 2020 (TATOLI)-Prokuradoria Jerál Repúblika (PGR-sigla portugés) husu $4,084,493 ba Estadu atu konsidera iha sira-nia proposta Orsamentu Jerál Estadu (OJE) tinan fiskál 2020.
Notísia Relevante : OJE 2020, MI foku selu dívida PNTL no responde ba família afetadu dezastre naturaís
“Ami prevee $4,084,493 ho nia programa prioridade mak sei halo manutensaun ba iha edifísiu nasionál PGR,” informa Diretora Jerál PGR, Ana Maria Pereira Carvalho, ba Agência Tatoli, ohin, iha ámbitu hala’o audiénsia ho komisaun A Parlamentu Nasionál.
Nia informa katak, orsamentu ne’e sura husi inísiu janeiru rejime duodesimal, nune’e iha proposta OJE 2020 halo ajustamentu de’it hodi ezekuta ba fulan rua to’o dezembru 2020.
“PGR ninia ezekusaun Dotasaun Orsamentu Temporáriu (DOT) kada fulan nian to’o ohin la’o ho di’ak,” hateten Ana Maria Pereira Carvalho.
Proposta orsamentu PGR 2020 hamutuk $4,084,493 koloka ba saláriu vensimentu $1,903,635, bens servisu $ 1,609,242, kapitál dezenvolvimentu $571,616, kapitál menór ho transferénsia públika laiha (0).
Husi orsamentu ne’e fahe ba PGR $ 3,478,153, Prokuradoria Distritál Baucau ($282,163), Prokuradoria Distritál Suai ($193,916) no Prokuradoria Distritál Oe-Cusse ($130,261).
Tuir dokumentu ne’ebé deskreve Planu Asaun Nasionál Anuál livru 2 medida prinsipál setoriál iha 2020, PGR prioritiza reforsa kapasidade ba ezersísiu kompeténsia konstitusionais, promove dezenvolvimentu institusionál no konsolida boa governasaun jestaun institusionál, asegura jestaun prosesu krime, ho prioridade rezolusaun ba kazu krime pendente, kapasita no jere rekursu umanu, formula proposta polítika no lejizlasaun no promove boa governasaun ho jestaun institusionál iha Ministériu Públiku, fortalese kapasidade rekursu umanu.
Jornalista : Nelson de Sousa
Editór : Francisco Simões
