Logotipu PCIC. Imajen Tatoli/Egas Cristovão

DILI, 07 outubru 2020 (TATOLI)-Parlamentu Nasionál (PN) aprova ona iha espesialidade Orsamentu Jerál Estadu 2020 ne’ebé aloka ba Polisia Santifika Investigasaun Kriminál (PCIC) ho montante  $1,390,253.

Notísia Relevante : Xefe Governu konsidera PCIC iha papél importante kombate krime organizadu

Membru Parlamentu Nasional halo aprovasaun ba orsamentu ba PCIC nian ne’e ho rezultadu votasaun a-favór 44, kontra 0, no abstensaun 21.

“Ho nune’e Orsamentu ba PCIC pasa,” deklara Prezidente Parlamentu Nasionál, Aniceto Longuinhos Guterres iha ámbitu diskusaun no aprovasaun iha espesialidade ba proposta Orsamentu Jerál Estadu (OJE) tinan 2020  iha Parlamentu Nasionál, ohin.

Hosi orsamentu $1,390,253 ba PCIC ne’e kobre ba    saláriu vensimentu $1,133,923, bens servisu  $ 256,330 , kapitál menór, kapitál dezenvolvimentu no transferénsia públika laiha.

PCIC nia papél koadjuva autoridade judisiária, dezenvolve no promove asaun ba prevensaun, detensaun  no  investigasaun tuir kompeténsia ka kompete ba  autoridade judisiária kompetente, ho ida ne’e asegura  sentralizasaun nasionál informasaun kriminál no  respetiva koordenasaun operasionál no  kooperasaun polisiál internasionál (Artigo 3º do Decreto-Lei nº 15/2014, de 14 de maio).

Tuir dokumentu orsamentál ne’ebé prevee iha livru  Planu Asaun Anuál (Livru 2) iha medida setoriál ba 2020,  PCIC fó prioridade hanesan promove asesu justisa, kontinua asegura  servisu prevensaun, detensaun, investigasaun kriminál ba krime grave, krime organizadu ka krime kompleksu, ho reforsa kooperasaun no koordenasaun nasionál ho  internasionál, akizisaun ekipamentu  báziku ba servisu  laboratorial  iha  ámbitu rekolla  prova material /teste DNA, impresaun dijitál, no seluk tan.

Alende ne’e prova pesoál, kontinua  promove formasaun hanesan formasaun  espesializada ba investigadór   espesialista iha area  laboratóriu de polísia sientífika, promove   boa governasaun no jestaun institusionál, fortalese kapasidade rekursu umanu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here