Primeiru-Ministru no Ministru Interiór, Taur Matan Ruak. Imajen Tatoli/Egas Cristovão

DILI, 13 agostu 2020 (TATOLI)-Primeiru-Ministru no Ministru Interiór, Taur Matan Ruak, konsidera Polísia Sientífiku Investigasaun Kriminál (PCIC, sigla portugés) iha  papél importante atu kombate krime organizadu iha nível nasionál no internasionál.

Xefe Governu hato’o asuntu ne’e, hafoin enkontru semanál ho Prezidente Repúblika, Francisco Guterres ‘Lú Olo’, hodi responde preokupasaun públiku nia kona-ba serbisu no kompeténsia PCIC.

“Polísia Sientífiku halo kontribuisaun di’ak atu kombate krime organizadu espera katak atividade sira ne’e sei halo nafatin atu evita krime organizadu iha ita-nia rai,” tenik PM Taur iha Palásiu Prezidensiál, Bairro Pité, kinta ne’e.

Tuir Xefe Governu, serbisu PCIC no Polísia Nasionál Servisu Investigasaun Kriminál (PNSIK) la hanesan tanba PNSIK tau matan liubá atividade krime loroloron, enkuantu PCIC foku ba krime mais organizadu.

“Dalaruma ita la konsege hatene, ita labele kombate asuntu ne’ebé iha relasaun ho nasaun sira seluk. Krime organizadu ne’e la’ós iha ita-nia nasionál de’it maibé  iha relasaun mós ho internasionál, tanba ne’e ita presiza instituisaun ne’ebé vokasionadu ba kestaun ne’e,” PM Taur akresenta.

Ministru Interiór ne’e dehan, Governu sei apoia PCIC atu luta kontra kriminalidade sira ho forma foun ne’ebé ezije kooperasaun, unidade asaun no kompromisu ba ema hotu nia di’ak.

PCIC hahú estabelese iha tinan 2009 ho akordu kooperasaun bilaterál entre Ministériu Justisa (MJ) Timor-Leste no Portugál ninian.

Iha maiu 2014, Dekretu-Lei númeru  15/2014 hetan aprovasaun, hodi kria ofisialmente órgaun polisál ne’e.

Iha nível nasionál, PCIC sei hala’o serbisu liuhosi kooperasaun ho entidade sira seluk ne’ebé halo investigasaun kriminál, hanesan Polísia Nasionál Timor-Leste (PNTL), Komisaun Antí-Korrupsaun (CAC, sigla portugés) no Servisu Migrasaun.

Iha fali nível internasionál, PCIC sei serbisu hamutuk ho The International Criminal Police Organization (INTERPOL) inklui ajénsia seluk ne’ebé hala’o serbisu kona-ba krime transnasionál.

Jornalista: Florêncio Miranda Ximenes

Editora: julia Chatarina

HAKEREK NO HATÁN

Please enter your comment!
Please enter your name here