DILI, 06 outubru 2020 (TATOLI) –Parlamentu Nasionál, ohin, halo ona aprovasaun iha espesialidade ba orsamentu ho montante $20,787,774 ne’ebé aloka ba Ministériu Negósiu Estranjeiru no Kooperasaun (MNEK) iha polítika Orsamentu Jerál Estadu (OJE) tinan fiskál 2020.
Notísia Relevante : MNEK fó prioridade ba servisu multilaterál iha 2021
Rezultadu aprovasaun orsamentu MNEK nian ne’e ho votu membru PN nian afavór 43, abstensaun 21 no kontra zero (0).
Orsamentu ho montante $20,787,774 ne’e aloka ba saláriu vensimentu $12,732,444, bens servisu $7,883,020, kapitál menór $143,535, transferénsia públika $28,775 no kapitál dezenvolvimentu (-).
“Medida prinsipál setoriál MNEK nian ba 2020 mak hanesan responde ho forma efikás no efisiente, liuhosi implementasaun polítika externa Timor – Leste nian,” hateten Ministra Negósiu Estranjeiru no Kooperasaun, Adaljiza Magno, iha nia intervensaun.
Nia afirma tan, ho osan ne’e mós mai atu fortalese, konsolida no haluan relasaun diplomátika ezistente no atua forma ho resíproka prepara funsionáriu diplomata ho kualifikada aas liu.
Ikus liu promove boa governasaun no jestaun institusionál no ministériu nian no servisu sira hotu iha MNEK.
Jornalista : Hortencio Sanchez
Editór : Francisco Simões
