KBRI Dili komemora Proklamasaun Indonézia ba dala-74, 17 agusto 2019. Imajen Tatoli/Dok

DILI, 06 outubru 2020 (TATOLI)–Embaixada Repúblika Indonézia (KBRI/Kedutaan Besar Republik Indonesia) iha Timor–Leste alerta ona ba nia emar sira atu labele halo viajen ilegál mai Timor-Leste no tenke kumpre regra Estadu emerjénsia (EE) iha Timor-Leste.

Notísia Relevante :Prevene COVID-19, KBRI Husu Limita Movimentu WNI Mai TL 

“Estadu Emerjénsia ida agora (daneen) ne’e rigor liu iha fronteira, limite movimentu sidadaun hotu nian iha fronteira atu tama mai Timor-Leste liuhosi dalan ilegál, entaun sidadaun hosi li’ur labele tama mai hosi dalan ilegál, nune’e bele kontrola no kumpre konfinamentu obrigatóriu loron 14”, haktuir karta ne’ebé embaixada Indonézia iha Dili fó sai, ne’ebé Agência Tatoli asesu, ohin.

Maski Estadu Emerjénsia maibé  atividade ekonomia, edukasaun no seluk tan la’o nafatin hanesan baibain, no mós halo tuir nafatin regra sira hosi Ministériu Saúde uza máskara, distánsia sosiál no seluk tan.

KBRI iha Dili mós husu ba nia sidadaun ne’ebé daudaun ne’e hela iha Timor–Leste karik dokumentu mate tenke kalma tanba governu Timor–Leste fó toleránsia.

“Governu Timor- Leste fó toleránsia ba sidadaun estranjeiru sira ne’ebé mak iha Timor ho dokumentu ne’ebé mate ona atu kontinua hela iha Timor–Leste depois mak hadi’a neineik”, karta ne’e mensiona tan.

Regra ba Estadu Emerjénsia ba daneen nian la diferente ho regra sira iha Estadu Emerjénsia da-lima ba kotuk. Maibé, diferente iha daneen nian mak rigor iha fronteira hodi limita movimentasaun sidadaun nian.

Governu liuhosi Ministériu Interior (MI)  aplika ona regra taka fronteira temporariamante. Nune’e sei fó multa ba ema ne’ebé tama ilegál. Multa ne’e kona hosi $30.00 to’o $250.00 kada ema no aplika ba sidadaun Timor–Leste no estranjeiru.

Ba sidadaun sé de’it mak iha Timor–Leste atu ba Indonézia tenke liuhosi postu terrestre tuir oráriu ne’ebé mak iha no ba sidadaun ne’ebé mai Timor–Leste hosi fronteira terrestre tenke rejistu iha embaixada Timor-Leste iha Indonézia atu bele hetan autorizasaun atu mai Timor-Leste.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here