Semitériu Espesiál Erois Pátria iha Lautém. Imajen/Mída PR.

DILI, 16 setembru 2020 (TATOLI)–Prezidente Konsellu Veteranu, Vidal de Jesus “Riak Leman”, hateten konsellu veteranu mós sei halo semitériu espesiál ida iha munisípiu sira hotu atu haloot veteranu sira ne’ebé mate para labele haketak ho nia feen-kaben ho nia oan sira.

Notísia Relevante: To’o agora Governu seidauk haree kondisaun oan-ki’ak no feto-faluk sira

“Ita mós hanoin sei halo semitériu espesiál iha munisípiu sira hotu. Tanba hanesan ne’e, ha’u mak veteranu maibé ha’u-nia feen ho ha’u-nia oan la’ós veteranu entaun ho semitériu espesiál ne’e bele haloot veteranu sira besik ba nia família hodi bele ba vizita,” sehan Prezidente Konsellu Veteranu, Vidal de Jesus “Riak Leman”, ba Agência TATOLI iha nia knaar fatin SERVE, Obrigado Barack, Matadoru, Dili, kuarta ne’e.

Prezidente Konsellu Veteranu ne’e hateten, bainhira veteranu sira mate ne’e bele haloot iha semitériu ne’ebé de’it, tantu nia semitériu públiku ka nia semitériu espesiál ne’e, laiha diferensa.

“Ba ha’u privadu, di’ak liu haloot ha’u iha semitériu ne’ebé mak besik ha’u-nia feen no oan sira atu nune’e sira bele ba haree ka vizita. Tanba realidade ne’ebé mak iha veteranu balun mate hakoi iha Jardin Erói Metinaro maibé família labele ba haree tanba problema dook no transporte laiha. Entaun, buat hirak ne’e halo konsellu veteranu hanoin harii semitériu espesiál iha munisípiu sira maibé karik OJE pasa,” nia dehan. 

Nia hateten, labele hanoin dehan hakoi iha jardin erói mak iha valór maibé hakoi iha ne’ebé de’it, nia nafatin kauza nasionál ne’ebé ninia funu liberta nasionál, patria no povu tanba ne’e nia (veteranu) ne’e nasionál nafatin.

“Bainbain ema dehan tenke hakoi iha jardin erói Metinaro mak iha valór maibé lae. Ita atu hakoi iha fatin ne’ebé de’it nafatin hanesan erói no lutadór ba libertasaun nasionál no patria. Bainhira hakoi bazea ba dekretu lei balun katak veteranu ne’ebé mak mate no hakoi tenke tiru kilat ba leten. Loloos ne’e istória iha karta (surat), la’ós iha semitériu ne’ebá,” nia dehan. 

Nia haktuir, Sekretáriu Estadu Asuntu Kombatente Libertasaun Nasionál (SEACLN) hamutuk ho Konsellu Veteranu kontinua halo sensibilizasaun ba populasaun sira iha munisípiu kona-ba levantamentu dadus tuir uma-lisan para hatene kada uma-lisan ne’e mate hira iha funu laran, hafoin sei harii monumentu ba kada postu administrativu atu tau ema sira mate iha funu laran nia naran iha monumentu ne’e no ikus mak halo deslutu nasionál.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here