Imajen/Media SAS.

DILI, 06 outubru 2020 (TATOLI)–Xefe Departamentu Abastesimentu Água Munisípiu Dili, Francisco Xavier Pereira, hateten Diresaun Nasionál Servisu Água (DNSA) sei aumenta tan rezervatóriu tanki Instalasaun Tratamentu Bee-Moos iha Kapitál Dili hodi reforsa tan rezervatóriu seluk tanba nesesidade ekonómiku no sosiál ekonómiku aumenta.

Notísia Relevante: WTP Sentrál komesa fahe bee-moos ba komunidade ho oráriu foun

“Agora ita-nia nessesidade ekonómiku no sosiál ekonómiku aumenta, automatikamente nesesidade bázika hanesan bee-moos presiza aumenta entaun konserteza hasa’e tan kapasidade rezervatóriu ne’ebé mak iha no aumenta tan rezervatóriu ka tanki Instalasaun Tratamentu Bee-Moos nian,: dehan Francisco Xavier Perreira, ba Agência TATOLI iha nia knaar fatin, Caicoli, Dili, tersa ne’e.

Nia hateten, tuir planu DNSA liuhosi Abastesimentu Água iha ona polítika no estratéjia ida hodi estabelese tan tanki Instalasaun Tratamentu Bee-Moos foun iha fatin balun iha Dili.

“Ami-nia planu polítika no estratéjia atu estabelese tan no konstrui rezervatóriu foun no rezervatóriu ne’ebé nia ezistensia ho durasaun kleur ne’e aat ona ne’e mak ami hanoin atu sobu no aumenta halo luan tan,” nia dehan. 

Nia informa, DNSA halo ona estudu viabilidade maibé haree ba oin oinsá atu halo preparasaun ne’ebé di’ak liután molok halo barajén.

“Tanba ita tenke hatene katak ninia parameter no barajén ba rezervatóriu nian ne’e no oinsá mak ita mós tenke tau nia land cover and hand use, para presiza haree hotu buat hirak ne’e mak bainhira ita harii barajén laiha problema,” nia hatete. 

Tanba ne’e, nia dehan, presiza haree ba tipu rai ne’e, sosiál ekonómia kona-ba rai, inklui haree land cover ka rezervatóriu nia matan, tanba tauk tempu udan mak bee latama ba rezervatóriu mak presiza bee ne’ebé mak kualidade di’ak, adekuadu, sufisiénte ba populasaun sira.

DNSA liuhosi Departamentu Abastesimentu Água Munisípiu Dili sei aumenta no hasa’e tan rezervatóriu tanki Instalasaun Tratamentu Bee-Moos (WTP-sigla inglés) Sentrál Bairru-pite no reservatóriu iha foho Cristal nia kapasidade ne’ebé boot, inklui hadi’a no aumenta tan kapasidade rezervatóriu Benamauk tanba rezervatóriu Benamauk ne’e kiik liu entaun presiza hanoin atu hasa’e no aumenta nia kapasidade.

Xefe ne’e haktuir, WTP Sentrál Bairru-Pite daudaun ne’e iha kapasidade 3000m3 maibé planu atu aumenta tan ba 6000m3.

“Rezervatóriu seluk iha urbana ita sei aumenta bainhira haree no observa kapasidade kiik entaun ita sei aumenta hotu. Agora halo ona designer engineering ka téniku dezain nian no deside hotu mak hein orsamentu para implementa de’it ona,” nia hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here