Foto Espesial

DILI, 05 outubru 2020 (TATOLI)–Xefe Departamentu Abastesimentu Água Munisípiu Dili, Francisco Xavier Pereira, hateten bailoron naruk afeta ba bee-moos iha área urbana nian tanba ne’e mak Tratamentu Bee-Moos (WTP-sigla Inglés) Sentrál Bairru-Pite komesa fahe bee-moos ba komunidade ho oráriu foun ho razaun débitu bee menus ba beibeik. 

“Ami komesa tiha ona ho oráriu foun hodi fahe bee-moos ba komunidade sira iha WTP Sentrál nian tanba bee-moos komesa menus ne’ebé mak kauza hosi bailoron naruk iha tinan ne’e,” dehan Francisco Xavier Pereirea ba Agência TATOLI iha nia knaar fatin Caicoli, Dili, segunda ne’e.

Tanba ne’e, nia dehan, Dirasaun Nasionál Água no Saneamentu (DNSA) hanoin atu distribui bee-moos loron ida ba uluk suku ida depois loron tuir mai ba fali suku seluk, se lae dadeer iha suku ida entaun lorokraik iha fali suku seluk, atu nunne’e ema hotu bele hetan bee-moos ne’ebé mak hanesan.

Ezempu, nia haktuir, loron dahuluk Bairru-Pite mak simu uluk entaun loron tuir mai sei distribui ba Manleuana, depois Palapasu, Maloa no seluk tan.

“Ita hahú ho meneira distribuisaun ida-ne’e kleur ona no hanoin atu implementa tan iha fatin seluk hodi nune’e parte urbana asesu bee-moos ho hanesan,” nia dehan. 

Nia hateten, DNSA sei haree uluk lai sistema izolamentu (sistem isolasi) ba kanu hirak ne’ebé mak iha rai okos. Tanba ne’e, tenke kontrola valula hodi supaly bee karik ba de’it kanu ida ba suku ida labele nakfahe fali iha dalan klaran.

“Tanba bainhira Abastesimentu fahe dala ida bee-moos ba populasaun iha Sidade Dili mak sei la sufisiente ba ita-nia komunidade sira. Tanba ita hotu hatene katak bailoron naruk hodi bee iha rai-leten no rai-okos komesa menus ba beibeik ona,” nia hatete.

Planu ba oin, xefe Abastesimentu ne’e hatete sei halo estudu ida ba bee iha rai-okos atu nune’e ba aoin bee ne’e uza ba tempu naruk hodi bele nesesita nesesidade populasaun nian iha futuru.

Nia dehan, ekipa DNSA kontinua esforsu no buka solusaun ida para oinsá populasaun sira bele asesu bee-moos ho sufisiénte maske débitu bee menus ona.

“Ami hanoin oinsá atu bele buka solusaun ba problema hirak ne’ebé mak ita-nia populasaun infrenta bee menus ba beibeik. Entaun ho ida-ne’e ami haree katak oinsá mak bele distribuisaun bee ne’ebé mak hanesan tenke distribui ho oras ka distribui ho loron,”  Francisco Xavier Pereira.

Jornalista: Osória Marques

Editór: Cancio Xiemenes

HAKEREK NO HATÁN

Please enter your comment!
Please enter your name here