Lalenok United FC kampiaun Tasa 12 Novembru époka 2019. Imajen Mídia LFA/Dok

DILI, 05 outubru 2020 (TATOLI) – Diretór Verifikasaun no Lisensa Liga Futeból Timor – Leste (LFTL), José Carvalho, lori órgaun LFTL, ohin, loke ona rejistrasaun ba klube primeira divizaun no segunda divizaun atu kompete iha Tasa 12 de Novembru, époka ne’e.

Notísia Relevante : Époka ne’e, LFTL la realiza liga

“Diresaun ezekutivu no diresaun hotu iha LFTL nia laran hala’o ona reuniaun deside ona, hahú ohin to’o 20 outubru, loke rejistrasaun ba klube sira  ne’ebé mak atu partisipa iha Tasa 12 de Novembru. Ita fó importánsia liu ba klube primeira divizaun ualu (8) no segunda divizaun 12 mak sei partisipa,” informa José Carvalho ba Jornalista sira liuhosi konferénsia imprensa, ohin, iha edifísiu LFTL, Bairru Formosa,Dili.

Nia dehan, prosesu rejistu mak klube sira tenke submete naran jogadór ho total 22 sei labele liuhosi ne’e.

“Iha prosesu barak mak komisaun ne’e tenta atu foti ona desizaun ho númeru jogadór kada klube 22 de’it, tanba jogu ne’e hala’o iha tempu ne’ebé badak tebes. Ita bele dehan jogu ida sistema vota fora ka lakon sai,” nia esplika.

Klube hirak ne’ebé sei partisipa mak hanesan, primeira divizaun, AD. SLB Laulara, Aitana FC, Boavista FC Timor, DIT FC, Karketu Dili FC, Lalenok United FC, Ponta Leste no Assalam.

Iha segunda divizaun nian mak, FIEL FC, Lica-Lica, Atletico Ultramar, Zebra FC, AS Marca, Emanuel FC, Sporting Clube de Timor, Porto Taibessi FC, Academica FC, Nagardjo, Kablaki FC no Santa Cruz FC.

Orsamentu ba jogu ne’e apoiu hosi Sekretáriu Estadu Juventude no Desportu (SEJD), ho total hamutuk $27,000,00-resin no jogu refere sei hala’o fulan novembru, tinan ne’e.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here