Obra Estátua Pe. João de Deus Pires hosi eskultór José do Carm. Imajen/Espesiál.

QUELICAI, 04 outubru 2020 (TATOLI)–Eskultór José do Carmo “Zeca” hateten, ohin loron nia sai eskultór ne’ebé mak famozu tebes iha Timor-Leste tanba uluk Saudozu Pe. João de Deus Pires, SDB, mak sempre promove ninia talentu liuhosi halo estátua Nosa Senhora nian iha estasaun misionária sira iha Dioseze Baucau nian.

Notísia Relevante: Don Basilio entrega sertifikadu akreditasuan ba eskultór José do Carmo

Eskultór José do Carmo “Zeca” ho nia espoza. Imajen TATOLI/Joanico de Araújo.

“Ha’u hanoin molok ha’u sai eskultór ne’ebé mak kuñesidu, saudozo Pe. João de Deus Pires, SDB, sai ha’u nia kompadre. Iha estasaun misionáriu kuaze iha Baucau laran, Saudozu João de Deus mak sempre promove ha’u no emprezariu Blue Rainbow. Maibé, ida ne’ebé mak sai ha’u-nia mestre rasik mak ha’u-nia aman rasik. Ha’u-nia aman mak eskultór primeiru ba ha’u no nia mak hanorin ha’u kona-ba talentu eskultór ne’e,” dehan Jose do Carmo “Zeca” ba Agência TATOLI hafoin inaugura estátua Saudozu João de Deus Pires, iha Igreja Quelicai, sábadu ne’e.

Nia dehan, bainhira sarani Parókia Santa Teresinha Quelicai husu nia atu halo no harii saudozu Pe. João de Deus ninia monumentu, nia la husu folin atu selu nia kosar-been maibé nia hakarak oinsá mak bele hamutuk harii avó João nia monumentu ida-ne’ebé mak di’ak tanba ho avó João ninia sakrifisiu ne’e sarani sira selu la hotu.

“Bainhira, ha’u-nia primu no maun sira hosi familia Moreira hateten ba ha’u, ha’u dehan ba sira katak imi ajuda ha’u ho materiál no osan de’it. Osan pur volta $5 mil, atu bele realiza estatua Pe. João de Deus ninia monumentu ida-nee,” nia dehan.

Iha prosesu halo estátua ne’e, nia haktuir, iha esperiénsia semana hirak liu ba molok atu harii estrutura ka kerangka saudozu João de Deus ninia estátua iha Quelicai ne’e, hetan difikulidade mak hanesan anin boot kuaze loron ida no kalan ida. Maibé, nia dehan, nia koko nafatin atu ko’alia ho saudozu João nia klamar liuhosi lian sira ho kultura hodi realiza halo no harii estátua refere bele finaliza ho di’ak.

“Akontesimentu hirak ne’e akontese tanba saudozu rasik bainhira sei moris la gosta festa boot no rame-rame. Estátua ninia aas ne’e metru ida ho balu (metro 1,30). Estátua ne’e ninia todan la to’o tonelada ida (1). Ha’u hanoin ne’e hanesan milagre ida. Tanba, ha’u hanoin katak bele termina to’o fulan ida (1) maibé ami halo loron 12 de’it. Maibé Graças a Deus ho tempu ne’ebé mak badak tebes,” nia haktuir.

Iha prosesu halo estátua padre João nian ne’e. nia dehan, nia lori ninia asistente na’in-rua (2) ne’ebé mak espesiál hodi fui estatua. Tuir nia, laiha suporta ruma hosi rai li’ur ka ajénsia internasional ruma maibé ho modalidade no inisiativa rasik hodi finaliza estátua ne’e.

Sarani Parókia Santa Teresinha Quelicai, Munisípiu Baucau, fó omenajen ba Pe. Joăo de Deus Pires, SDB, liuhosi harii monumentu no estátua atu memória ne’e labele lakon no moris nafatin iha sira-nia fuan.

Tuir dokumentu ofisiál ne’ebé Agência TATOLI asesu haktuir, tinan ida dahuluk ba Pe. João de Deus Pires, SDB, nia mate to’o oras ne’e, sarani sira tau liman hamutuk hodi harii monumentu ida ba nia iha Quelicai atu fó omenajen no sai memória ba Amu João ninia sakrifisiu no dedikasaun sira, liuliu atu ida idak tau iha ninia neon rasik buka halo tuir ninia esperitu no exemplu sira obidiente, fiar metin ba Nai Maromak nia laran no ba Nain Feto Maria Auxialiadora.

Dokumentu ne’e haktuir, amu padre Joăo de Deus Pires, mai iha iha Timor serbisu barak liu iha parte lorosae nian hodi habelar no hametin sarani sira nia fiar no moris santu nian, kontribui no promove esperitu patriotizmu no nasionalizmu nian hodi partisipa mós luta Timor-Leste nian ba auto determinasaun no indepedénsia nian ne’ebé oras ne’e hakerek ona iha istoria Timor nian.

Padre Joăo de Deus pires hamutuk ho Padre Eligio Locatelli harii monumentu Nasionál rua iha Timor-Leste mak monumentu Nossa Senhora Rainha da Paz iha Laualiu no monumentu ida seluk mak monument Kristu Rei iha foho Matebian nia tutun ne’ebé oras ne’e sai tiha ona nu’udar fatin turistiku relijiozu no istóriku iha Timor-Leste.

Obra ikus liu mak Lar Santa Terrzinha de Quelicai ne’ebé halibur hodi forma no eduka foinsa’e sira liuliu oan-ki’ak no sarani sira atu sai sarani di’ak no sidadaun onestu. Hafoin hela loron hira tan ba halo tinan 27 harii estátua Kristu Liurai iha Matebian tutun, iha 10 outubru 1993, iha loron 03 fulan outubru tinan 2020, sarani Quelicai-oan sira harii hikas Saudozu Pe. João de Deus Pires nia estátua iha Quelicai.

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here