Monumentu Saudozu Pe. João de Deus Pires, SDB. Imajen TATOLI/Joanico de Araújo.

QUELICAI, 03 outubru 2020 (TATOLI)–Sarani Postu Administrativu Quelicai, Munisípiu Baucau, kontribui osan ho voluntariamente hodi harii estátua Saudozu Pe. João de Deus Pires, SDB.

Prezidente Komisaun Organizadora, Sebastião Pereira Pires Gaio, hateten objetivu harii monumentu Saudozu Pe. João de Deus Pires, SDB, nu’udar sinál agradesimentu no orgullu nian ba saudozu, tanba bainhira nia sei moris nia rasik mak buka meiu oin-oin hodi halo obras oin-oin ho intensaun ida atu eduka Quelicai-oan sira sai matenek no lori sira ba Kristu nian no halo sidade sai furak.

Notísia Relevante: Amu pároku husu sarani Quelicai haburas nafatin Pe. João de Deus nia domin

Sebastião Pereira Pires haktuir, orsamentu ne’ebé mak gasta ba monumentu ne’e kuaze rihun $15 hodi kompra materiál atu habahat (mengukir, red) no osan ba estatuáriu ka ema ne’ebé halo estátua nia kolen de’it hodi harii monument ne’e to’o ramata.

“Ha’u hanoin orsamentu ne’ebé mak gasta ba monumentu ne’e kuaze rihun 15 hodi sosa materiál. Maibé, ema ida-ne’ebe mak halo monumentu ne’e, fó de’it ninian kolen. Medida ba estatua ne’e liu metru rua (2). No, ema ne’ebé mak halo estatua ne’e mak José da Costa (Zeca) mos nu’udar ema antigu alunu salezianu ida,” Sebastião Pereira Pires Gaio ba Agência TATOLI iha Igreja Santa Teresinha de Menino Jesus, Quelicai, sábadu ne’e.

Nia dehan, harii monumentu Saudozu João de Deus Pires, SDB, apenas inisiativa de’it hosi sarani no Quelicai-oan sira-nian. Maski laiha osan maibé Quelicai-oan sira esforsu-aan hodi hahú obra ba monumentu ne’e iha iha fulan juñu 2020 to’o ramata.

“Ha’u hanesan Prezidente Komisaun relata ba Quelicai-oan sira katak fou-foun halo monumentu ba Saudozu João de Deus Pires, SDB nian ne’e, ami rasik laiha osan. Maibé ida-ne’e hanesan inisiativa de’it hosi ami-nian nu’udar sinál domin ida ba amu João de Deus. Ami halo monumentu ne’e, iha fulan juñu liubá mak komesa halo obra ida-ne’e to’o fali agora,” nia hatutan.

Maski nune’e, nia dehan, Quelicai-oan sira hotu buka meiu oin-oin atu bele halo monumentu ne’e, nune’e Quelicai-oan sira iha Baucau no Dili mós komesa halibur malu ona hodi tau hanoin hamutuk atu iha orsamentu rasik atubele harii ona monumentu ida-ne’e.

Tanba, nia informa, se lahó prezensa Saudozu Pe. João de Deus Pires, SDB, nian iha ai Quelicai ne’e,  obra hotu iha Quelicai labele la’o bá-oin. Obra hirak ne’ebé mak amu estranjeiru husik hela ne’e mak hanesan harii hela Igreja, eskola, harii uma ba órfaun sira no komunidade Saleziana hodi tau matan ba orfonatu sira.

“Ami Quelicai-oan sira orgullu boot ida atu halo monumentu ida-ne’e. Katak, se la’ós avó João de Deus Pires, SDB, ninia prezensa iha ami nia fatin, ninia obra sira hanesan halo eskola, igreja, komunidade Saleziana sira-ne’e labele la’o ba oin,” nia haktuir.

Prezidente komisaun ne’e relembra katak Amu Joao ninia objetivu prinsipál mak bainhira sama-ain iha Quelicai mak hakarak atu harii eskola hodi bele eduka Quelicai-oan sira ne’ebé mak la asesu ba edukasaun, ikusmai balun to’o sai matenek hodi asume mós kargu importante iha nasaun ida-ne’e.

Objetivu prinsipál seluk, nia dehan, mak nia hakarak harii kapela iha Quelicai ho objetivu atu lori sarani sira tuir fé kristaun nian liuhosi haklaken Maromak nia liafuan. Nia harii asrama ba orfonatu sira no komunidade Saleziana atu labarik oan-kiak no ema kbiit laek sira-nia oan sira bele hamahon-an bá, no nia harii igreja boot ida ne’ebé furak tebe-tebes no agora sai Parokia Santa Teresinha do Menino de Jesus.

“Ho buat hirak ne’ebé mak nia halo, ami hanoin no sentidu ida katak ho Amu João de Deus nia favór, ami Quelicai-oan sira nunka selu. Maibé, ami hotu hamutuk hakarak atu hatudu de’it ninia imajen iha fatin ida-ne’e no ema hotu-hotu ne’ebé mak mai karik iha Quelicai, haree no sente katak amu ida-ne’e mak halo fatin ida-ne’e, sai kapaas no furak liu iha Foho Matebian nia hún,” nia hateten.

Nia haklaken, hafaoin halo tiha serimónia inaugurasaun sei buka tuir ninia sasán sira seluk no hakerek mós kona-ba ninia istória hodi bele tau iha ninia eskritóriu. Iha-ne’e, nai dehan, komisaun sei la fó sai ema hirak ne’ebé mak fó sira-nia kontribuisaun ba harii monumentu ida-ne’e.

“Ami komisaun lakohi fó sai ema hirak ne’ebé mak fo kontribuisaun maibé tuir ami-nia hanoin katak ki’ik ka boot hotu-hotu fó hotu kontribuisaun. Nune’e, ami hanesan tau ona livru ida hodi tau de’it iha ninia eskritóriu. Sé mak mai haree karik ba haree de’it livru. Bainhira lee sai, balun fó kontribuisaun boot no balun ki’ik, balun serbisu de’it bele hamosu sentimentu ida. Nune’e ami sei la fó sai totál orsamentu iha serimónia ohin nian. Ami mós halo eskritóiu ida hodi tau ninia sasán sira ne’ebé mak durante ne’e amu matebian uza iha nia moris mak hanesan batina, kalis, no dokumentu importante balun tan,” nia salienta.

Nia dehan, maski avó João de Deus nu’udar ema estranjeiru maibé ninia kontribuisaun iha funu no ba libertasaun nasionál ne’e nu’udar ema klandesitina ida, tanba ne’e Estadu Timor-Leste mos rekoñese amu João de Deus “Liras” nu’udar eroi ida no medalla ne’e simu direta hosi Pe. António Transfiguração, SDB.

“Ba ha’u-nia mensajen, ba ami-nia sarani sira mak ne’e katak iha Quelicai konsidera sarani Salezianu, ne’ebé Salezianu ninia prezensa halo rai Quelicai sai sidade. Tanba ne’e mak ami sei hamutuk ho Salezianu ba nafatin ho bá-oin. Parókia Quelicai sei la entrega ba kualker kongregasaun seluk,” Xefe Komisaun ne’e tenik.

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here