Prezidente Repúblika, Francisco Guterres ‘Lu Olo’. Imajen Tatoli/António Gonçalves

QUELICAI, 03 outubru 2020 (TATOLI)—Prezidente Repúblika (PR), Francisco Guterres ‘Lú Olo’, hateten monumentu saudozu Pe. João de Deus Pires ne’ebé harii hosi timoroan liuliu Quelicai-oan sira ne’e atu fó hanoin beibeik hahalok di’ak no ezemplár ne’ebé nia kesi ba povu Timor-Leste ho domin aas tebes.

Notísia Relevante: Monumentu Pe. João de Deus sai hanesan símbolu gratidaun ba povu

“Parabéns ba maluk timoroan sira tanba foti inisativa harii monumentu hodi fó onra ba saudozu Pe. João de Deus Pires iha kompleksu igreja parokiál no lar Santa Teresinha iha Quelicai. Monumentu ne’ebé harii hosi Quelicai-oan sira ne’e atu fó hanoin beibeik hahalok di’ak no ezemplár ne’ebé nia kesi ba povu Timor-Leste ho domin aas tebes,” dehan Prezidente Repúblika, Francisco Guterres “Lú Olo” iha nia diskursu ne’ebé lee hosi Diretór Jerál Prezidénsia Repúblika, Domingos do Amaral, iha marjen inaugurasaun monumentu Pe. João de Deus Pires no selebrasaun misa padroeira Santa Teresinha Quelicai, sábadu ne’e.

Reprezentante Prezidente Repúblika, Diretór Jerál Palásiu Prezidensiál, Domingos Amaral. Imajen TATOLI/Joanico de Araújo.

Lú Olo relembra katak Estadu Timor-Leste fó ona rekoñesimentu ba padre nia dedikasaun liuhosi kondekorasaun Medalha Ordem Dom Martinho iha 2012, hosi Prezidente Repúblika, Taur Matan Ruak, no Medalha Ordem Timor-Leste títulu póstumu iha 2019, husi atuál Xefe Estadu rasik.

“Padre João de Deus sei nafatin iha ita hotu nia fuan, hosi jerasaun ba jerasaun. Nia naran tama mós iha lista asu’ain Timor-Leste,” Prezidente Repúblika hateten.

Xefe Estadu haktuir, amu João de Deus, salezianu Dom Bosco, lahusik povu Timor-Leste bainhira iha oportunidade atu fila bá nia-rain iha 1975. Padre ne’e ho hakarak rasik deside hela iha Timór to’o loron nia bá aman Maromak nia kadunan.

“Nia mai ho domin no ita simu nia ho domin. Nia tane maka’as tebes ita-nian mehi no fiar atu ukun rasik-aan. Tanba luta hamutuk ho ita, nia mós hetan tortura hanesan luta-na’in sira seluk. Ohin, Timor-Leste hamriik nu’udar nasaun livre no independente ho mós amu João de Deus ninia dedikasaun liuhosi knaar sura rohan-la’ek,” Lú Olo hateten.

Padre João de Deus hakotu iis iha 22 setembru 2019. Amu portugés ne’e mai Timor-Leste iha 1958 ho sentidu umanista tebes.

Jornalista: Osória Marques

Editor: Cancio Ximenes

HAKEREK NO HATÁN

Please enter your comment!
Please enter your name here