Bispu Dioseze Baucau, Don Basílio do Nascimento, halo omilia iha selebrasaun misa padrueira Parókia Santa Teresinha do Menino Jesus Quelicai. Imajen TATOLI/Maria Auxiliadora Ximenes.

QUELICAI, 03 outubru 2020 (TATOLI)—Amu Bispu Dioseze Baucau, Dom Basílio do Nascimento, hateten monumentu Saudozu Pe. João de Deus Pires, SDB, sai hanesan símbolu gratidaun hosi povu no sarani sira iha Parókia Santa Teresinha do Menino Jesus Quelicai nian.

Notísia Relevante: Sarani Quelicai harii monumentu ba Saudozu Pe. João de Deus Pires

Monumentu Saudozu Pe. João de Deus Pires, SDB, nian iha Quelicai. Imajen TATOLI/Joanico de Araújo.

“Ita-nia saudozu amu João de Deus Pires nia monumentu sai hanesan símbolu gratidaun hosi sarani sira liuliu ba Parókia Santa Teresinha do Meninho Jesus Quelicai. Saudozu Pe. João de Deus ne’e sai testemuña id aba nia pastoral durante iha Parikia Quelicai,” dehan Bispu Dioseze Baucau, Don Basilio do Nascimento, iha ninia omilía ba selebrasaun misa mahein Santa Teresinha do Meninho Jesus no Inaugurasaun Monumentu Memória Saudozu Pe. João de Deus Pires, SDB, nian iha Parókia Santa Teresinha do Menino Jesus, Quelicai, sábadu ne’e.

Don Basilio do Nascimento hateten, oinsá atu haklaken Na’in Maromak nia liafuan liuhusi situasaun real, amu João de Deus Pires sempre hakbesik aan ba nia sarani sira hanesan iha Postu Administrativu Laga, Venilale, Baucau no dalaruma to’o iha rai Quinamoko-Lospalos ne’ebá.

Iha omilía ne’e, amu Bispu Don Basílio haklaken Santa Teresinha sai inspiradora ba padroeiru sira-nian iha mundu tomak no nia vokasaun mak “Ha’u-nia hadomi no ha’u-nia hadomi mak ha’u-nia sasukat” katak hadomi ha’u-nia maluk sira biar ha’u la haree sira-nia oin maibé liuhosi ha’u-nia orasaun ha’u bele halo buat ruma ba maun-alin sira.

“Tanba ne’e ohin komemora Santa Teresinha nia loron entaun ita inagura monumentu Pe. João de Deus hodi kontinua fó apresiasaun. Agradese ba amu João nia dedikasaun tomak durante tinan 61, liuliu ba sarani hosi Lorosa’e partikularmente parókia Santa Teresinha do Menino Jesus Quelicai.

Saudozu Pe. João de Deus, Don Basílio haktuir, bainhira Pe. João sei moris, nia hameno hela ba Bispu Dioseze Baucau katak loron ruma atu fahe Parókia Laga karik Postu Administrativu Quelicai husik iha Salesiano sira-nia liman.

“Iha istóra liga ba parókia nian. Dala ida amu João ko’alia ho amu Bispu Dioseze Baucau katak hanoin loron ruma atu fahe Parókia Laga karik, Postu Quelicai husik mai ami sai salesiano. Entaun, ha’u dehan, enkuantu amu sei moris ita-boot nia hakarak sai orden no desizaun parókia nian, ha’u sei rona ita-boot.  Katak, amu João nia fuan metin tebes,” Don Basilio haktuir istória badak ne’e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here