Imajen/Media PN.

DILI, 03 outubru 2020 (TATOLI—Parlamentu Nasionál, sábadu ne’e aprova estensaun Estadu Emerjénsia daneen ho unanimidade hodi autoriza Prezidente Repúblika, Francisco Guterres “Lú Olo” dekreta Estadu Emerjensia ba loron 30 tán.

Notísia Relevante: CNRT propoin halo lei substitui Estadu Emerjénsia

Deputadu sira halo votasaun nominál (bolu deputadu idak-idak nia naran). Rezultadu votasaun ba estensaun Estadu Emerjénsia daneen ne’e ho votu a-favór 55, kontra 0 no abstensaun 0.

“Ho nune’e projetu-lei autorizasaun renovasaun Estadu Emerjénsia pasa, espera Governu bele implementa ho di’ak,”  prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária, sábadu ne’e.

Prezidente Repúblika, Francisco Guterres “Lú Olo”, husu Parlamentu Nasionál atu autoriza estensaun Estadu Emerjénsia daneen, ba loron 30 tán tán, hahú hosi 00.00 iha loron 05 outubru 2020 (segunda-feira) no termina iha oras 23.59 iha loron 03 novembru 2020 (2020) ba territóriu nasionál tomak, parsialmente suspende direitu balun.

  1. Sirkulasaun internasionál, sei estabelese kontrolu sanitáriu iha portu, aeroportu ka postu fronteira terrestre, atu impede moras ne’e tama mai territóriu nasionál ka kondisiona observánsia kondisaun nesesáriu hodi evita risku propagasaun epidemia ne’e, nune’e mós toma medida nesesária asegura sirkulasaun internasionál ba bens no serbisu esensiál sira.
  2. Liberdade sirkulasaun, fixasaun rezidénsia ba kualkér pontu iha territóriu nasionál sei lidera hosi autoridade públika sira hodi bele redús risku kontájiu no ezekuta medida prevensaun no kombate epidemia, inklui konfinamentu kompulsivu domisiliáriu no impozisaun saniáriu sira.
  3. Direitu rezisténsia, kualkér atu (ato) rezisténsia ativa ka pasiva emanda hosi autoridade públika kona-ba ezekusaun Estadu Emerjénsia.

Deputadu Bankada KHUNTO, Luis Roberto, hateten parlamentu tenke prontu fó autorizasaun ba Xefe Estadu deklara Estadu Emerjénsia tanba moras ne’e perigu hodi fó kbiit ba Governu halo prevensaun ba COVID-19.

“Importante halo jestaun kontrolu iha terrestre, seguransa tenke seguransa servisu ho imparsiál inklui komunidade iha-ne’ebá. Ami-nia pozisaun mantein estende tan Estadu Emerjénsia ne’e tanba aimoruk atu kura moras ne’e mós seidauk hetan,” Deputadu Luis Roberto hateten.

Deputada bankada PLP, Maria Angelina Sarmento Lopes, husu Governu kria kondisaun iha kuarentena nune’e intermu ijiene ba pasiente sira.

Entretantu Deputadu Bankada FRETILIN, Joaquim dos Santos, hateten informasaun ne’ebé iha polísia konsege kaer ema balu liuhosi jalan ikus to’o mós munisípiu balun.

“Signifika ita-nia kapasidade kontrola iha fronteira, liuliu jalan tikus ne’e frajil. Pergunta mak ne’e señor Primeiru Ministru tanbasá mak ita la mobiliza polísia sira hosi munisípiu sira para reforsa iha fronteira. Sé ita mobiliza polisia hosi munisípiu rotativamente, ha’u hanoin ema labele borus hosi fronteira ba munisípiu sira, ne’e perigu,” Deputadu Joaquim dos Saantos, hato’o preokupasaun ne’e liuhosi plenária, sábadu ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here