Xefe Bankada CNRT, Duarte Nunes. Imajen Tatoli/Egas Cristóvão

DILI, 03 outubru 2020 (TATOLI)—Bankada Congresso Nacional da Reconstrução de Timor (CNRT) propoin Governu halo lei ida hodi substitui deklarasaun Estadu Emerjénsia.

Notísia Relevante: COVID-19, PN husu PNTL reforsa seguransa iha fronteira Terrestre

Xefe Bankada CNRT, Deputadu Duarte Nunes, hateten situasaun ne’ebé Timor-Leste hasoru preokupante maibé aplika ona dalima (5) ona no agora atu ba daneen (6) ona aplika Estadu Emerjénsia.

“Situasaun Estadu Emerjénsia ho lei seluk, la presiza ita tenke mai beibeik iha parlamentu hodi aprova estensaun ne’e, liuliu Lei Protesaun Sivíl ne’ebé Prezidente Repúblika veta,” Xefe Bankada CNRT, Deputadu Duarte Nunes, propoin liuhosi plenária Parlamentu Nasionál, sábadu ne’e.

Iha loron 5 agostu 2020 liubá, Bankada Parlamentár partidu Congresso Nacional da Reconstrução de Timor (CNRT) husu Prezidente Repúblika promulga mak Lei Protesaun Sivíl nune’e la presiza deklara tán Estadu Emerjénsia (EE) maibé Xefe Estadu veta lei refere tanba kontra konstituisaun.

Membru Bankada CNRT Deputada Carmelita Caetano Moniz mós konkorda ho Duarte Nunes nia deklarasaun katak Timor-Leste seidauk tama iha situasaun ida emerjénsia.

“Lei Protesaun Sivíl ne’e importante, lalika to’o Estadu Emerjénsia.  Ha’u hanoin loron ida Governu lori Lei Protesaun Sivíl mai parlamentu ho karáter urjénsia, ha’u-nia hanoin lei ne’e serve atu rezolve situasaun sira-ne’e tanba iha lei ne’e iha etapa tolu (3), alerta, kontijénsia no kalamidade,” Deputada Carmelita Caetano Moniz fó hanoin ba Governu.

Jornalista: Evaristo Soares Martins

Editór: Cancio Ximenes  

HAKEREK NO HATÁN

Please enter your comment!
Please enter your name here