Fronteira terrestre Mota-ain, Batugade, Imajen Tatoli/António Gonçalves

DILI, 03 outubru 2020 (TATOLI)-Primeiru-Ministru (PM), Taur Matan Ruak, rekoñese katak fronteira terreste kontinua sai dezafíu boot hodi kontrola sidadaun sira tama mai territóriu nasionál, tanba sei rejista sidadaun sira tama liuhosi dalan ilegál ho númeru aas tebes iha fulan ikus.

“Infelizmente seguransa iha fronteira kontinua sai dezafíu boot ida, fulan agustu to’o setembru ema tama ilegál hamutuk na’in-390, maibé konsege hatama hotu sira ba fatin kuarentena,” hateten Xefe Governu iha ámbitu diskusaun ba pedidu estensaun deklarasaun Estadu Emerjénsia (EE) daneen, iha sala plenáriu Parlamentu Nasionál (PN), sábadu ne’e.

PM esplika ema na’in-390 ne’ebé tama mai Timór liuhosi fronteira terrestre ho dalan ilegál ne’e na’in-222 hanesan membru artemarsiál Persaudaraan Setia Hati Terate (PSHT), ne’ebé daudaun ne’e autoridade sira halo hela investigasaun.

“Halo investifasaun atu haree iha duni favoresementu hosi ajente seguransa hosi ita-nia no Indonézia, tanba estrañu númeru volume boot mak atravesa. Ha’u mós estuda seriemente rejime seguransa fronteira ba agora no ba futuru,” nia akresenta.

Notísia Relevante: Governu deside loke fronteira loron-17 dala ida

Xefe ezekutivu ne’e haktuir, iha ema na’in-140 submete ba investigasaun polísia no idaidak ba ona uma, ne’ebé hosi tama ilegál sira ne’e inklui Indonézia na’in-haat mak deporta ona no Nova Zelandia na’in-ida.

“Ami promete kontinua halo esforsu kontinua tau-matan ba fronteira, Graças a Deus maski númeru tama ilegál fronteira terrestre boot, maibé to’o agora kazu detetadu mai hosi ema tama dalan legál, ba ne’ebé tama ilegál ne’e seidauk iha,” nia tenik.

Xefe Governu iha esperansa, ema tama ilegál la loris moras ne’e tanba bainhira iha maka susar atu evita transmisaun lokál.

“Sira halai subar ba uluk sira-nia família, entaun prejudika família no bele daet ba komunidade ho tan moras oioin iha komunidade nia leet, ne’e la’ós ona polítika maibé ne’e loos duni no mate duni,” nia fó hanoin.

Antes ne’e, Governu deside loron loke fronteira terrestre ba loron-17 dala ida hodi fó biban kontrola fatin kuarentena, ne’ebé tempu entrada uluk semana ida tama dala ida iha oras rua nia laran ba ema.

Razaun aumenta loron ne’e tanba tuir Governu ema tama iha kuarentena barak no susar atu kontrola.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here