Primeiru-Ministru, Taur Matan Ruak, akompaña ho membru Governu sira partisipa debate kona-ba aprovasaun ba deklarasaun Estadu Emerjénsia iha sala plenáriu Parlamentu Nasionál, tersa (11/08). Imajen Tatoli/Egas Cristovão

DILI, 11 agostu 2020 (TATOLI)-Primeiru-Ministru (PM), Taur Matan Ruak, informa daudaun ne’e Governu deside aumenta loron loke fronteira terrestre ba loron-17 dala ida hodi fó biban kontrola fatin kuarentena.

“Governu halo mudansa tempu entrada, uluk semana ida tama dala ida iha oras rua nia-laran, daudaun ami fó loron-17 tama dala ida, ne’e ba ema,” tenik PM Taur iha konfirmasaun deklarasaun Estadu Emerjénsia (EE) iha sala plenáriu Parlamentu Nasionál (PN), tersa ne’e.

Tuir Xefe Governu, razaun Governu aumenta tempu entrada tanba ema tama iha kuarentena foin lalais barak demais no susar atu kontrola.

“Foin lalais ema na’in-400 tama fatin kuarentena, susar tebes dala-ruma lensol la fase, froña la troka no ema ba toba filafali. Entaun Governu tau fali tempu ne’e naruk oituan inklui iha kuarentena mós amenta tán ba loron-17, nune’e loron 14 ema sai hosi kuarentena, loron rua fó biban halo limpeza hodi ema seluk tama filafali,” nia akresenta.

Razaun seluk, PM argumenta katak fatin ba kuarentena limitadu.

Maski nune’e, Governu kontinua autoriza sasán tama maihusi fronteira, maski limita iha buat balun.

“Sasán kontinua haruka tama tanba kuandu la haruka tama sasán, klaru katak bele aumenta inflasaun rai-laran, tanba ita buka sasán ho kuantidade boot maibé sasán ne’e menus, entaun presu sasán bele sa’e,” nia esplika.

Nia dehan, Governu halo esforsu atu  jere entre kombate COVID-19 no mós jere impaktu husi moras ne’e rasik ba ekonomia rai-laran.

“Asuntu rua ne’e defísil tebes, tanba Governu tenke hatene oinsá jere atu lebele haree de’it moras ne’e maibé haree mós oinsá ema labele falta hahán. Entaun jestaun ne’e nein país hotu iha mundu konsege halo, maibé Timór ho difikuldade tomak konsege jere,” nia subliña.

Governu opta medida rua ba impaktu ekonómiku

Xefe Governu informa, atu jere impaktu ekonómiku no sosiál, Timor-Leste opta medida rua no prevee ona orsamentu ba asuntu ne’e.

“Medida estabilizasaun ne’e kustu millaun $140 no mós medida rekuperasaun faze dahuluk tau iha orsamentu 2020, no sei ezekuta iha fulan novembru no dezembru 2020. Maibé medida ne’ebé ita toma, Governu ko’alia ona ho ita-nia parseiru dezenvolvimentu, embaixada no emprezáriu sira para atividade ekonómika iha ita-nia nasaun ne’e bele dentru posibilidade bele hahú,” nia esplika.

Bainhira hahú COVID-19, membru ajénsia internasionál, embaixada no emprezáriu hamutuk ho traballadór sira sai hotu ba sira-nia rai tanba ne’e daudaun Governu autoriza sira tama filafali hodi ajuda rekupera ekonómika rai-laran.

“Ita autoriza neneik ba neneik sira tama fali tanba bainhira sira la tama ita-nia projetu boot sira labele la’o no atividade seluk labele la’o, entaun ita haruka tama filafali maski iha risku, maibé akompaña mós to’o momentu ne’e ita sei jere di’ak,” nia akresenta.

Problema boot seluk ne’ebé Governu hetan mak kona-ba inseguransa jurídika ba aktu públiku.

“Aleinde aumentu moras iha país viziñu sira, risku importasaun ne’e boot kuandu ita loke oituan, liuliu inseguransa jurídika. Seguransa jurídika ne’e protesaun legál ba aktu públiku, tanba ne’e susar itu deskute legál ka la legál, tanba kestaun ne’e kria mós dezkonfiansa ba ita-nia sidadaun sira ba governu,” PM dehan.

Tanba ne’e, Governu  deside avansa implementa Estadu Emerjénsia ba área fronteira de’it.

“Medida implementasaun mós ami reforsa atu monta de’it iha fronteira postu ualu, haat iha Oé-cusse no haat entre Salele no Batugade,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here