DILI, 03 outubru 2020 (TATOLI)–Governu liuhosi reuniaun estraordinária Konsellu Ministru (KM), aprova ona projetu dekretu Governu ne’ebé aprezenta hosi Primeiru-Ministru, Taur Matan Ruak, kona-ba medida ezekusaun deklarasaun Estadu Emerjénsia (EE) faze daneen, ne’ebé fó sai ona hosi dekretu Prezidente Repúblika númeru 62/2020, loron 03 outubru, hodi hatan ba pandemia COVID-19.
Ministru Prezidénsia Konsellu Ministru, Fidelis Manuel Leite Magalhães, hateten EE iha faze ne’e abranje territóriu nasionál tomak ba loron 30 no vigora hahú tuku 00:00 loron 05 outubru to’o tuku 23:59 loron 03 novembru 2020.
“Individu ne’ebé tama territóriu nasionál la tuir dalan ne’ebé deskreve ona, maka sei selu multa $30 to’o $250 no osan sira ne’e sei suporta ba despeza iha fatin izolamentu profilátiku (kuarentena),” relata Ministru Fidelis, hafoin ramata reuniaun ezekutivu iha Palásiu Governu, sábadu ne’e.
Koima ne’e aplika ba timor-oan no sidadaun estranjeiru ne’ebé tama mai teritóriu Timór ho dalan ilegál.
“Ba sidadaun estranjeiru aleinde aplika koima, bainhira tama iha fatin kuarentena durante loron 14 tenki selu rasik despeza no hafoin kumpre loron ne’e maka Governu deporta ba sira-nia rain,” Ministru akresenta.
Notísia Relevante: PN aprova estensaun EE daneen ho unanimidade
Prezidente Repúblika dekreta ona estadu emerjénsia daneen
Dekretu Governu ne’e determina mós katak ema hotu ne’ebé hakarak tama no sai hosi territóriu nasionál, tenke sujeita ba kontrolu sanitáriu nian.
“Tama no sai hosi territóriu nasionál exkluzivamente hosi postu fronteira abilitadu sira no durante oras efetivu ne’ebé funsiona,” nia fo hanoin.
Nune’e mós, bandu sa’e autokarru, ró ka aviaun, ba ema hotu ne’ebé hatudu kualkér sintoma hanesan temperatura isin-lolon nian to’o 37,50º C ba leten, me’ar, kakorok moras, inus-been no fani, no susar atu dada iis, esetu iha kazu evakuasaun médika nian.
“Sidadaun ne’ebé hakarak tama rai-laran tenke sujeita ba kuarentena ho durasaun mínima loron 14 no halo teste ba COVID-19. Prazu ne’e la aplika ba membru tripulasaun aviaun ne’ebé asegura transporte tula pasajeiru internasionál no merkadoria, inklui motorista sira ne’ebé lori karreta boot hodi tula merkadoria entre nasaun liuhosi rai-maran,” nia informa.
Sujeita mós ba kuarentena ho durasaun mínima loron 14 ba individu ne’ebé hatudu sintoma no suspeitu infetadu COVID-19 maibé hafoin halo teste ho rezulta inklokluzivu.
Profisionál sáude iha sentru izolamentu ne’ebé tau-matan ba infetadu halo kontaktu besik, hela hamutuk ka iha ambiente hanesan ho ema infetadu tenke kumpre kuarentena loron 14.
Ba individu ho nasionalidade estranjeiru ne’ebé hakarak tama iha territóriu nasionál hosi fronteira terrestre, tenke rejista no husu autorizasaun tama iha postu konsulár sira.
Maibé iha kazu exesionál justifika ho razaun saúde no seguransa populasaun, Ministériu Interiór bele determina taka temporáriu ka hamenus oráriu atendimentu ba públiku iha postu fronteira sira.
Kontinua halo distansiamentu sosiál no uza máskara
Medida ne’e mensiona mós katak individu hotu durante vijénsia EE, tenke adota no promove komportamentu distansiamentu sosiál no étika respiratóriu.
Evita partisipa halibur ema barak no mantein distánsia maizumenus metru ida resin ho individu seluk, uza máskara taka inus ho ibun, no fase liman beibeik liliu entrada komersiál no edifísiu públiku no administrasaun públika nian.
Durante períodu ne’e, lisensa no autorizasaun administrativu no dokumentu sira hotu válidu nafatin no la haree ba durasaun prazu validade nian.
Fiskalizasaun ba dispozisaun iha diploma ne’e kompete ba forsa no servisu seguransa inklui ekipa vijilánsia epidemiolójika no sanitária.
“Tanba ne’e ema labele kontra ho forma saida de’it ativa ka pasiva, hasoru orden ne’ebé fó sai ona hosi autoridade públika kompetente sira iha ezekusaun deklarasaun Estadu Emerjénsia,” Ministru Fidelis subliña.
Jornalista: Antónia Gusmão
Editora: Julia Chatarina
