Deputado FRETILIN, Joaquim dos Santos. Imajen Tatoli/Egas Cristóvão

DILI, 03 outubru 2020 (TATOLI)Reprezentante povu iha uma fukun Parlamentu Nasionál husu Polísia Nasionál Timor-Leste (PNTL) halo prevensaun iha ámbitu surtu COVID-19.

Reprezentante povu sira hato’o preokupasaun hirak iha ámbitu debate estensaun Estadu Emerjénsia daneen (6) iha Parlamentu Nasionál, sábadu ne’e.

Deputadu Bankada FRETILIN, Joaquim dos Santos, hateten informasaun ne’ebé iha polísia konsege kaer ema balu liuhosi jalan ikus to’o mós munisípiu balun.

“Signifika ita-nia kapasidade kontrola iha fronteira, liuliu jalan tikus ne’e frajil. Pergunta mak ne’e, señor Primeiru-Ministru tanbasá mak ita la mobiliza polísia sira hosi munisípiu sira para reforsa iha fronteira. Se ita mobiliza polisia hosi munisípiu rotativamente, ha’u hanoin ema labele borus hosi fronteira ba munisípiu sira, ne’e perigu,” Deputadu Joaquim dos Saantos, hato’o preokupasaun ne’e liuhosi plenária, sábadu ne’e.

Tanba, tuir nia, bele konsege deteta iha nasionál maibé parte sira iha rurál perigu tanba la deteta iha fronteira entaun ema sira-ne’ebé tama mai ne’e ba liu sira-nia hela fatin.

Xefe bankada Frente-Mudança (FM), Deputada Isabel Maria Barreto Freitas Ximenes, laiha objesaun ba Estensaun Estadu Emerjénsia.

“Husu Governu reforsa seguransa iha área fronteira sira. Ekipamentu protesaun pesoál ba forsa sira nune’e sira sente dignu hodi hala’o sira-nia servisu no fasiliddade tenke sufisiente hodi presta servisu ho profisionál,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here