Primeiru-Ministru, Taur Matan Ruak, hamutuk ho membru Governu sira defende Proposta OJE 2020 iha debate faze jeneralidade ba loron daruak, iha sala plenáriu PN, sesta (02/10). Imajen Tatoli/António Gonçalves

DILI,  02 outubru (2020)—Prezidente Parlamentu Nasionál (PN) husu deputadu sira tenke debate prinsípiu no sistema orsamentu hosi proposta-lei Orsamentu Jerál Estadu (OJE) 2020 iha faze jeneralidade tanba Rejimentu Parlamentu Nasionál (RPN) mak obriga la’ós debate fali asuntu seluk.

“ita-nia debate ne’e ha’u haree halai sees tanba deputadu halo deklarasaun polítika latuir rejimentu. Loloos ne’e iha faze jeneralidade ne’e ita ko’alia kona-ba prinsípiu no sistema orsamentu,” Prezidente Parlamentu Nasionál, Deputadu Aniceto Longuinhos Guterres Lopes, fó hanoin ba deputadu sira liuhosi debate proposta OJE iha faze jeneralidade loron daruak nian, iha Parlamentu Nasionál, sesta ne’e.

Deputadu Aniceto Guterres hateten ba RPN Sesaun III kona-ba diskusaun no votasaun iha jeneralidade iha plenária tenke tuir artigu 105 (inísiu diskusaun).

Alínea 1 hosi RPN artigu 105, esplika diskusaun iha jeneralidade foka ba prinsípiu no sistema projetu ka proposta-lei ida-idak nian.

Alínea 2 hosi artigu ne’e hateten, diskusaun inklui aprezentasaun ba inisiativa hosi ninia autór, iha minutu 15 nia laran, aprezentasaun konkluzaun hosi relatóriu no paresér hosi relatór (deputadu ne’ebé lee relatóriu no paresér), iha minutu 10 nia laran, no períodu ida ba pergunta no resposta.

Bazeia ba Rejimentu Parlamentu Nasionál ne’e, Deputadu Aniceto Guterres sei inkurta (habadak) deklarasaun hosi deputadu sira bainhira la foka prinsípiu no sistema orsamentu.

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here