Xefe Departamentu Moras La Hada´et, Frederico Bosco. Foto: MS

DILI, 02 outobru 2020 (TATOLI)-Ministériu Saúde liuhosi Departamentu Moras La hada’et, hahú iha loron 01 to’o 02 fulan-outobru ne’e avalia programa pakote esensiál moras la hada’et ne’ebé mak implementa ona iha Munisípiu Dili, Ermera no Liquiça.

Iha tinan 2018, programa pakote esensiál moras la hada’et implementa ona iha Sentru Saúde Gleno Munisípiu Ermera, Sentru Saúde Formosa no Sentru Saúde Comoro Munisípiu Dili.

Notísia Relevante :MS Sei Implementa Pakote Esensiál Moras La Hada’et ba Munisípiu Neen

Nune’e iha marsu  2020 kontinua kompleta programa ne’e ninia implementasaun iha Sentru Saúde hotu-hotu iha Dili no Ermera, Liquiça.

”Pakote esensiál iha Munisípiu tolu ne’e implementa  ho di’ak tebes, uluk iha moras la hada’et hanesan diabetes no hipertensaun ne’ebé dalaruma sira mai dala ida de’it entaun ho implementasaun ida ne’e ita komesa identifika sira iha ita-nia tratamentu no sira halo hela tratamentu regulár,” dehan Xefe Deparatamentu Moras La Hada’et, Frederico Bosco ba jornalista sira iha JL Villa sesta ne’e.

Nia dehan, ezemplu iha Sentru Saúde Gleno, programa ne’e iha progresu di’ak tanba kada fulan bele deteta pasiente ho moras diabetes no hipertensaun ema na’in 70 kompara ho antes pasiente menus husi na’in neen.

”Signifika ita nia deteksaun ne’e di’ak no mós reteinsaun mos di’ak entaun pasiente 70 ne’ebé maka ita halo deteksaun ne’e agora daudaun halo tratamentu regulár,” nia hateten.

Tuir nia deteksaun sedu ne’e importante atu halo tratamentu regulár nune’e bele prevene pasiente sira husi atakasaun kurasaun, stroke, rins no seluk tan.

”Impaktu pozitivu ida mak uluk ita seidauk implementa ida ne’e sentru emerjénsia sira simu moras emerjénsia hipertensivu barak tanba ema ne’ebé maka moras hipertensaun mak la halo tratamentu regulár nia hamosu tensaun ne’ebé maka’as halo ema ulun moras oin halai, bainhira la halo atendimentu ho lalais bele hetan stroke,” nia dehan.

Iha tinan ne’e, Ministériu Saúde iha ninia alvu atu implementa tan programa ne’e ba Munisípiu Baucau, Manatuto no Bobonaro.

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here