Logo Ministériu Saúde.

DILI, 23 juñu 2020 (TATOLI)-Ministériu Saúde (MS), iha tempu badak sei implementa programa pakote esensiál ba moras la hada’et iha Munisípiu Neen iha Timor-Leste.

Xefe Departementu Moras La Hada’et, Frederico Bosco, hateten antes ne’e, MS implementa ona programa ne’e iha Munisípiu Dili, Ermera no Liquiça.

“Ita fó uluk Munisípiu neen tanba ita haree uluk ba iha programa ida ne’e no la’ós ita ba introdúz dei’t maibé ita introduz signifika ita kapasita ita-nia ema hanesan profisionál saúde sira halo mós monitorizasaun avaliasaun ba sira oinsá mak bele implementa programa ne’e,” informa nia ba Jornalista sira iha edifísiu SAMES Kampung-Alor, tersa ne’e.

Pakote esensiál moras la hada’et ne’e hodi haforsa koidadu saúde primária iha  Postu Saúde,  Sentru Saúde, no mós Sentru Internamentu sira ne’ebé mak presta servisu ba komunidade  nune’e tenki pro-ativu liu para oinsá mak  bele halo prevensaun.

Nia dehan, dahuluk liliu halo formasaun no sensibilizasaun informasaun ba komunidade, autoridade lokal no seluk tan kona-ba moras tensaun, ran midar, iis boot no seluk tan.

Nune’e mós deteta sedu ba pasiente moras la hada’et sira  hodi  halo tratamentu sedu ba prevene mate sedu.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here