Parade ofisiaís F-FDTL. Imajen/TATOLI

DILI, 02 outubru 2020 (TATOLI)–Diretora Programa Nasionál Dezenvolvimentu Suku (PNDS), Claudina Soares Pires, informa Governu liuhosi Ministériu Administrasaun Estatál (MAE) konvoka enkontru ho FALINTIL-Forsa Defeza Timor Leste (F-FDTL) hodi ko’alia kona-ba seguransa iha selebrasaun loron proklamasaun 28 novembru ne’ebé tuir planu sei realiza iha Liquiça.

Notísia Relevante: Selebrasaun loron proklamasaun 28 novembru sei realiza iha Liquiça

“Ami halo enkontru ida ho F-FDTL hodi ko’alia kona-ba seguransa ba iha selebrasaun loron proklamasaun 28 novembru ne’ebé mak Governu deside hala’o iha Munisípiu Liquiça. F-FDTL sei fó seguransa ba selebrasaun loron Proklamasaun 28 Novembru ne’e,” Diretora PNDS, Claudina Soares Pires, ba Agência TATOLI iha nia knaar fatin, Colmera, Dili, sesta ne’e.

Nia hateten, atu asegura seguransa iha selebrasaun ne’e Governu fó kompeténsia ba parte seguran no defeza hanesan F-FDTL ho PNTL sira hodi bele garante serimónia isar bandeira ne’e to’o ramata.  

Diretora ne’e hateten, preparasaun ba serimónia ne’e hahú ona tanba ekipa tun ona terrenu hodi halo verifikasaun ba iha fatin komemorasaun ne’ebé mak sei realiza iha Liquiça, iha Suku Lauhata nian.

Preparasaun ne’e, tuir nia, sei koordena mós ho Ministériu Turizmu, Sekretáriu Estadu Arte no Kultura (SEAK) no Sekretáriu Estadu Juventude no Desportu atu oinsá loke feira no atividade seluk hodi bele anima iha selebrasaun loron proklamasaun ne’e.

“Maske hala’o iha Liquiça maibé nia hanesan komemorasaun nasionál tanba sei partisipa hosi ita-nia órgaun soberanu hotu inklui ho membru Governu no Parlamentu Nasionál no mós komunidade sira hotu sei konsentra iha Liquiça,” nia dehan.

Nia infoma, parada isar bandeira sei involve ho Polisia Nasionál Timor Lorosa’e no F-FDTL, tanba baibain korpu içar bandeira kompostu hosi estudante sira iha munisípiu 12 inklui Rejiaun Administrativu Espesiál Óe-Cusse Ambeno (RAEOA).

“Ita-nia ekipa sira ne’e mak sei hasa’e no hatun bandeira iha selebrasaun loron proklamsaun 28 novermbru iha Liquiça,” nia hateten. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here