Seremónia isár bandeira iha Munisípiu Covalima, Imajen Ajénsia Tatoli/Xisto Freitas.

DILI, 30 setembru 2020(TATOLI)–Diretór Jerál Ministériu Administrasaun Estatál (MAE), Belarmino Filomejo Neves, hateten Governu aprova ona kalendáriu ba selebrasaun loron proklamasaun RDTL 28 novembru ne’ebé sei realiza iha Munisípiu Liquiça.

“Governu aprova ona ajenda ka kalendáriu loron proklamasaun 28 novembru ba tinan ne’e sei selebra iha Munisípiu Liquiça,” dehan Diretór Jerál MAE, ba jornalista Agência TATOLI, iha nia knaar fatin Colmera, Dili, kuarta ne’e.

Nia hateten, hanesan baibain selebrasaun ba loron nasionál hanesan 20 de maiu, 20 de agostu, no loron proklamasaun 28 novembru ne’e sempre hala’o haleu munisípiu sira entaun iha tinan ida-ne’e Governu sei selebra loron proklamasaun 28 novembru ne’e iha Munisípiu Liquiça.

“Ita-nia tradisaun tinan-tinan ba loron boot la’ós ba ema iha nasionál de’it maibé oinsá atu hatudu no kuda sentidu patriotizmu rejiliénsia hanesan nasaun nia oan mak povu hotu-hotu tenke sente raan no ruin nian ne’e. Tanba ne’e, munisípiu sira hotu ita sei haleu hodi selebra loron nasionál sira iha munisípiu,” nia dehan. 

Nia informa, munisípiu sira seluk hotu ona no agora hela de’it mak munisípiu Liquiça, Ainaro, Baucau no Manatuto. Tanba ne’e, nia dehan, loron proklamasaun 28 novembru tinan ne’e sei monu ba iha Liquiça.

Agora daudaun, nia haktuir, komisaun organizadora rejistu ona korpu içar bandeira ne’ebé mak tenke mai hosi munisípiu 12 inklui Rejiaun Administrativa Espesiál Óe-Cusse Ambeno (RAEOA).

Parte MAE mós, nia dehan, halo ona aprosimasaun ho igreja hodi halo misa ba loron proklamasaun 28 novembru ne’ebé mak deside tuir kalendáriu misa sei realiza iha loron 27 novembru.

Eventu ne’e, nia informa, iha Komisaun Nasionál ne’ebé mak lidera direita hosi Ministru Administrasaun Estatál (MAE) ho nia vise MAE no mós Sub-Komisaun ida iha Liquiça ne’ebé mak oras-ne’e daudaun halo mobilizasaun iha terrenu ona.

Nia haktuir, selebrasaun loron proklamasaun 28 novembru ne’e sei prezide hosi Prezidente Repúblika Timor Leste, Francisco Guterres ‘Lú-oló’.

Nia informa, orsamentu ne’ebé mak Governu aloka ba serimónia proklamasaun 28 novembru ne’e hamutuk rihun $300 ba atividade tomak.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here