Unidade Polísia Fronteira (UPF). Imajen/PNTL

DILI, 30 setembru 2020 (TATOLI)- Komandu Polisia Nasionál Timor-Leste (PNTL) Unidade Patrullamentu Fronteira  (UPF), ohin, selebra aniversáriu ba dala-XVII (30 setembru 2003-30 setembru 2020).

Selebrasaun aniversáriu ne’e sei hala’o ho parade militár iha oras 17:00 Otl, iha Kuartél UPF Batugade, Dili, sei partisipa direita hosi Komandante Jerál PNTL, Komisáriu Faustino da Costa ho komandante unidade sira inklui komandante sira hosi F-FDTL.

UPF hari ho objetivu fó orientasaun ba Unidade Patrullamentu Fronteira relasiona ho prosedimentu pratika ka funsaun espesializada no seguransa fronteira bainhira hala’o sira-nia knaar no fó komprensaun ida kona-ba knaar no funsaun operasionál, administrativa membru hotu-hotu iha PNTL nia Unidade Patrullamentu Fronteira.

Baze Legál mandatu ba PNTL nia Unidade Patrullamentu Fronteira (UPF) ne’e foti husi: IV Governu Konstitusionál nia Dekretu-Lei nú.9/2009, loron 18 fevereiru, kona-ba lei orgánika Polísia Nasionál Timor-Leste, artigu 33.

Funsaun hala’o patrullamentu no vijilánsia iha fronteira territoriál sira, no iha koordenasaun no kooperasaun ho parte interesada sira seluk, espesialmente ho F-FDTL. Kontrola movimentu ema no sasán sira iha fronteira territoriál, ho koordenasaun no kooperasaun ho Servisu Imigrasaun no Alfándega.

Atu koopera ho autoridade administrativa relevante sira seluk tuir lejizlasaun fiskál, Aduaneira no Sanitaria.

Atu aplika lei sira relasiona ho tráfiku umanu, tráfiku droga ilegál, tráfiku kilat no atividade kriminál organizadu sira seluk. Fó seguransa iha Aeroportu hodi hala’o patrulla hale’u pista, terminál no aeroportu ho kooperasaun hamutuk ho parte interesada sira seluk no knaar lejítimu sira seluk, tuir nia misaun

Ba daudaun ne’e, UPF ho membru hamutuk 363, kompostu hosi feto na’in-16, mane  na’in-347  Komanda hosi Superintendente, João Sancho Pires, hala’o hela sira-nia misaun seguransa iha fronteira terrestre, Bobonaro, Covalima, Oe-Cusse no Aeroportu Dili.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here