Personil Banda Muzika OVID-16. Imajen/Espesial.

OSSÚ, 01 outubru 2020 (TATOLI)—Hosi foho ba Dili ne’e ksolok ida. Hosi Dili ba foho ne’e animasaun ida. Ksolok no animasaun ne’e mout iha arte ida-nia kbiit hodi anima ema ua’in be hamrook ba divertimentu.

Situasain ida-ne’e mak akontese ba artista nasionál hosi Dili hanesan Ovid-16, Wins Angle, Família Alkatraz (Soldadu Negro), Banda Maun Alin, no komedianu Ari Bargon, Sule Timor no Magician Oscar, doko rai Ossú ho sira-nia talentu no kreatividade.

Notísia Relevante: Don Basilio: “Noite Kulturál prezerva valór kulturál”

Iha kalan ne’ebá, kuarta (30 setembru 2020) kalan be nakukun ne’e, iha Prasa Pe. Manuel Silveira Luis Ossú nian, harii palku ida be orna ho ahi-oan sira ho kór oin-oin. Kalan ne’e nabilan be nabilan. Anin be huu halo ahi-oan sira mós  bidu no lakan naroman.

Iha prasa ne’e, nakonu ho ema atus ba atus nia ulun. Labarik no foinsa’e sira. Ferik eh katuas. Klosan eh kaben-na’in sira. Ida-idak liki-aan ba Prasa ne’e, atu haree aprezentasaun hosi artista sira hosi Dili ne’e. 

Dansa, sira haree dansa. Kanta, sira kanta hamutuk ho grupu banda múzika sira-nia múzika. Hamnasa, sira hamnasa hamutuk ho komedianu Aro Bargon no Sule Timor. Hmanasa no ksolok ne’e sai sira-nian tanba durante propagasaun COVID-19 ne’e, sira hamrook ba animasaun sira atu bele kura no kasu netik sira-nia laran triste sira.

Artista sira hosi Dili ba anima populasaun sira iha Ossu.

Animasaun hirak ne’e akontese iha ámbitu komemorasaun ezisténsia Parókia Ossú iha Reinu Ossú-Ossoroa ba dala-83 liuhosi ekipa animadora realiza atividade “Noite Kulturál” durante kalan rua tuituir malu. Aleinde aprezentasaun lokál, ekipa animadora mós kontaktu ho artista Ossú-oan sira iha Dili no ho artista nasionál sira seluk hodi anima mós parokianu Ossú iha eventu refere.

Iha kalan daruak, parokianu Ossú animadu ho prezensa artista nasionál sira hanesan Ovid-16, Wins Angle, Famíla Alkatraz (Soldadu Negro) no Banda Maun-alin. Aleinde grupu banda múzika, prezente mós komedianu Ari Bargon, Sule Timor no Magician Oscar ne’ebé lori magic ho títulu violénsia.

Bainhira ekipa animadora konvida grupu banda Maun-Alin ho múzika tolu, partisipante sira sei hakmatek iha sira-nia fatin hamriik ba ne’e. Palku hahú manas bainhira grupu banda Magic Angle no Soldadu Negro anima partisipante ho sira nia múzika koñesidu sira hanesan “Makerek”, “Tinan 100 Tan” hosi Alkatraz no múzika sira seluk tan, halo partisipante sira haksoit no dansa ida-idak nian iha sira-nia fatin. 

Maske rai-kalan malirin maibé ema sira ne’ebé asiste aprezentasaun hirak ne’e, sente haksolok hodi halakon “malirin” ne’e ho dansa haksoit tuir ida-idak nia gostu tuir múzika sira-nia rítmu. Palku letan sai rame liután bainhira komedianu Ari Bargon aprezenta mós ninia talentu no kreatividade iha parte komediu nian ho ninia maneira rasik atu bele anima ema seluk. Lakohi atu lakon, kreatividade hosi komedianu Sule Timor no Magician Oscar nian mós halo partisipante sira hamnasa kaer kabun hodi ha-ha-haek.

Aprezentasaun OVID-16 iha palku leten.

Sente manas no palu ne’e hetok nakdoko liután, bainhira grupu múzika Banda Ovid-16 [ho personil; Alex Pasaribu, Milus, Jinho, Nino, Eric, no Joe] hakat ba sa’e ba palku leten. Ema hotu hein.

Sira [Ovid-16) ne’e atu hananu aiknananuk saida hodi anima populasaun sira iha Ossú ne’e. Múzika lian, eh, la seluk no la leet, sira hananu múzika koñesidu sira hanesan “Saudades”, “Permanente”, no “Ó Mak Anju Nia Lalatak” halo partisipante sira doko aan no haksoit iha fatin to’o rai-rahun su’ar.

Reprezentante banda Múzika Ovid-16, Alex Pasaribu, hateten sira sente haksolok tanba bele hetan konvite hodi anima fans sira iha Ossú no kontribui harame fatin ne’e, no halo ema koñese di’ak liután sira-nia ezisténsia nu’udar banda múzika. Sira kanta iha palku leten, populasaun sira hamriik haksoit, sena-malu, dansa ho sira ida-idak nia jeitu. Rame ne’e, rame tebes duni. 

“Ami kontente tebes tanba bele kontribui hodi harame fatin ne’e no halo ema koñese di’ak liu tan ami-nia ezisténsia. Ba oin, Ovid-16 sei koko hodi kria múzika ne’ebé furak liután. Ha’u hato’o mensajen ba belun foinsa’e sira iha Timor laran tomak katak ‘Nakar Ne’e Tenke ho Talentu’,” dehan Alex Pasaribu ho oin-midar.

Rai malirin. Kalan nakukun ba beibeik. Ksolok ne’e mós mihis ba daudaun. Ema ida-idak foti ain hakat daudaun ba sira-nia uman. Relojiu hatudu ona ba tuku 01:00 madrugada. Rai hetok malirin be malirin. Situasaun kontinua kalma no buat hotu la’o iha órden nia laran. Molok atu ramata, foinsa’e Ossú-oan sira rame-rame hadau malu hodi hasai fotografia ho artista sira hosi Dili inklui ho komedianu Ari Bargon.

Nakukun nia liras hanesan unuk metan ida falun rai Ossú hetok nakun be nakukun. Ahi-oan sira palku nian lakan mesa-mesak no lakan ba nafatin ne’e, la manan “nakukun” ida-nia kbiit. Rai nakukun lori populasaun sira ida-idak fila ba sira-nia uman. Rai ne’e, hetok fuik no fuik fila-fali.

Kontribuidór: Memensio Sequeira Freitas

Editór: Cancio Ximenes

HAKEREK NO HATÁN

Please enter your comment!
Please enter your name here