Bispo Dioseze Baucau, Don Basilio do Nascimento, bainhira hatan ba jornalista sira iha Palásiu Prezidensiál Nicolau Lobato Bairo Pité. Imajen TATOLI/Egas Cristovão

OSSÚ, 01 outubru 2020 (TATOLI)—Serimónia “Noite Kulturál” ne’ebé realiza hosi grupu animadora Parókia Ossú ba komemorasaun aniversáriu Parókia Ossú ba dala-83 ho objetivu atu anima parokianu sira iha Ossú ne’e hetan entuziasmu makaas hosi labarik no foinsa’e sira. Noite Kulturál refere atu esplora no hatudu foinsa’e sira-nia talentu sira hodi prezerva nafatin valór kulturál.

Notísia Relevante: Aniversáriu Parókia Ossú, ekipa animasaun sei realiza “Noite Kulturál”

Bispu Dioseze Baucau, Don Basilio do Nscimento, hateten serimónia “Noite Kulturál”  ne’ebé hala’o iha Parókia Ossú ne’e hanesan meu ida atu bele prezerva nafatin valór kulturál ne’ebé povu Ossú sira iha no husu atu promove kultura típika sira Ossú nian hanesan kustume sama-haré, halo to’os no fetosan-umane nian.

“Noite Kulturál sira iha parókia sira hanesan ne’e, nu’udar meiu atu bele prezerva nafatin valór kulturál ne’ebé povu ida-ne’e [Ossú] iha. Ha’u enkoraja ekipa animadora no parokianu Ossú tomak, atu ba oin, promove no aprezenta liuliu aprezentasaun kulturál típika sira Ossú nian hanesan kustume sira sama-haré nian, halo to’os, ko’alia lia fetosaan-umane no seluk tan,” dehan Bispu Dioseze Baucau, Don Basilio do Nascimento, iha ninia intervensaun ba Noite Kulturál loron daruak (30 setembru 2020) iha Prasa Pe. Manuel Silveira Luis, Ossú, kuarta ne’e.

Iha biban hanesan, Pároku Ossú Hipolito da Silva Soares hato’o mensajen ba joven sira atu bele kolabora malu liuliu asegura no garente seguransa hodi halo eventu “Noite Kulturál” bele la’o ho di’ak no hetan susesu.

“Ha’u apela ba ba joven sira atu bele kolabora malu liu-liu asegura no garante seguransa hodi eventu ida-ne’e bele la’o di’ak no hetan susesu,” nia dehan.

Aleinde ne’e, Prezidente Ekipa Animadora Frater João Paulo hato’o agradesimentu ba parte hotu-hotu ne’ebé kontribui ona atu realiza eventu “Noite Kulturál” ida-ne’e. Eventu sira hanesan ne’e, nia hatutan, nu’udar meiu ida atu muda mentalidade foinsa’e sira-nian hosi hahalok violénsia ba hahalok kreatividade no animasaun nian.

Aprezentasaun dansa tradisionál iha Noite Kulturál. Imajen/Memensio Sequeira Freitas.

“Ami hato’o agradesimentu ba parte hotu-hotu ne’ebé kontribui ona atu realiza eventu ida-ne’e. Eventu sira hanesan ne’e nu’udar meiu ida atu muda mentalidade foinsa’e sira-nian hosi hahalok violénsia ba hahalok kreatividade no animasaun nian. Ami agradese tanba iha ema di’ak balu mak hanoin atu kria kondisaun hodi bele halibur ema seluk,” nia dehan.

Entretantu, membru grupu animadora no estudante ida, Dinho Dube no Letícia Camacho, sente haksolok tanba sarani Ossú halo kolaboarsaun di’ak no joven sira partisipa hodi garante seguransa ba iha realizasaun eventu “Noite Kulturál” ba ema hotu atu haksolok no hakmatek. Sira hateten, eventu ne’e la’ós de’it fó ksolok ba ema maibé bele halibur Ossú-oan sira hodi fahe ksolok no domin ba malu no ba Inan Mahein Santa Teresinha.

Iha “Noite Kulturál” ne’e aleinde animasaun oin-oin hosi Ossú-oan sira iha Ossú, harame mós hosi artista sira ne’ebé mai hosi Dili. Mezmu kalan boot no malirin, maibé eventu ida-ne’e hetan entuziasmu forte tebes hosi ema barbarak  hodi asiste to’o ramata.

Grupu sira ne’ebé aprezenta sira-nia aprezentasaun liu grupu 50 hosi bairru sira, eskola sira, grupu kategoriál ne’ebé hamahan aan iha Parókia nia okos no mós indivídu sira ne’ebé hakarak uza sira-nia kreatividade anima ema seluk.

Noite Kulturál ba kalan dahuluk rejista aprezentasaun lokál hamutuk grupu 35 ne’ebé kompostu hosi poezia, teátru, kántiku, dansa tradisional, dansa moderna no dansa tiktok. Partisipante sira ne’ebé asiste Noite Kulturál iha kalan dahuluk, estimadu ema pur volta 2000-resin ne’ebé nakonu iha Prasa Pe. Manuel Silveira Luis Ossú nian.

Tama ba kalan daruak, partisipante sira aumenta barak liután kuaze ema hamutuk 3000-resin mak partisipa iha eventu kalan daruak nian. Partisipante sira ne’e la’ós mai de’it hosi Ossú maibé balun mós hosi Parokianu Viqueque, Parokianu Uatulari no fatin seluk tan. Iha kalan daruak ne’e, partisipa mós hosi Administradór Postu Administrativu Ossú, Amu Bispu Dioseze Baucau, Xefi Suku Liaruka no Ossú de Cima, membru Konsellu Pastorál no parokianu.

Kontribuidór: Memensio Sequeira Freitas

Editór: Cancio Ximenes

HAKEREK NO HATÁN

Please enter your comment!
Please enter your name here