Preparasaun palku ba "Noite Kultural". Imajen/Memensio Sequeira Freitas.

OSSÚ, 28 setembru 2020 (TATOLI)—Prezidente Komisaun Organizadora, Frater João Paulo, hateten iha selebrasaun aniversáriu parókia Ossú ba dala-38 ne’e Ekipa Animasaun Parókia Ossú sei realiza “Noite Kulturál” ho preparasaun la’o di’ak tebes tanba hetan kontribuisaun fíziku no serbisu hosi joven sira, madre sira no ekipa animadora sira atu bele halo susesu noite serimónia refere.

Nia hatutan, durante ne’e ekipa animadora hetan apoiu finanseira no lojístiku hosi entidade oin-oin liuliu hosi animadór sira no emprezáriu Ossú-oan balu hodi fó apoiu ba atividade “noite kulturál” ne’e liuhosi halo ajuda finanseiru no ajuda materiál.

“Parókia Motael Dili liu hosi nia pároku (Pe. Guilhermino da Silva) ho nia Vigáriu (Pe. Mariano Maia) ajuda orsamentu uitoan ba iha aranjamentu ekipamentu ba Banda Santer nian. Padre Carlito Titilaka mós suporta osan uitoan ba aranjamentu ekipamentu sira. Emprezáriu Ossú-oan na’in ba Grafika TALITI ne’eb’e ajuda prodús banner sira ne’ebé tau iha palku. Aleinde apoiu finanseiru no lojístiku, ekipa Animadora mós uza ninia osan saldu tinan kotuk nian hodi kompleta ekipamentu balu ne’ebé laiha no hetan mós kontribuisaun lampu balun hosi Ossú-oan sira iha Ossú atu bele harame “noite kulturál” ida-ne’e,” dehan Prezidente Komisaun Organizadora, Frater João Paulo, ba kontribuidór Agência TATOLI iha Ossú, segunda ne’e.

Grupu lokál ne’ebé sei aprezenta sira-nia animasaun, nia informa, atinje ona pur volta grupu 30 no ekipa animadora sei jere tempu hotu-hotu ho di’ak atu grupu ida-idak bele iha oportunidade ba aprezentasaun. Grupu lokál ne’ebé sei halo aprezentasaun mak hanesan Banda Santer (hanesan uma na’in) grupu Jardín Infantil São Lucas Ossú, Eskola Báziku no Sekundáriu sira iha Ossú, grupu kategoriál sira iha Parókia Ossú hanesan Joven ba Kristu, Akólitu, Eskuteiru no selu-seluk tan no hosi bairru neen (6) ne’ebé eziste iha Ossú Vila.

Aleinde grupu lokál, nia hateten, iha loron 30 setembru  kalan mós sei iha palku “Ossú Talent Show” ne’ebé sei harame hosi ekipa artista ne’ebé sei mai hosi Dili. Artista nasionál sira-ne’e sei koordena hosi artista Ossú-oan, Bosime Guterres (kontestante DAA-3) ho voluntariamente.

“Artista sira-ne’ebé sei mai ho Bosime atu halibur parokianu Ossú iha dia 30 setembru kalan ne’e mak hanesan Ovid-16, Wins Angle, Arie Bargon’s Group no Magic “Sule Timor”. Grupu hirak ne’e sei sai hosi Dili iha dia 30 dadeer no konfirmadu katak sira sei anima parokianu Ossú durante oras haat (4) nia laran. Hosi ekipa Animadora prepara de’it alojamentu no osan uitoan ba transporte nian atu fasilita sira-nia estadia iha Ossú,” nia dehan.

Nia hateten, animasaun sei la’o durante kalan rua (2) nia laran molok Parókia Ossú selebra loloos ninia aniversáriu ba dala-83 iha loron 01 fulan Outubru 2020 fulan oin mai. Nia dehan, ida-ne’e hanesan pontu kulminante ba festa tinan ida-ne’e mak sei iha selebrasaun Misa Eukaristia ne’ebé prezide direitamente hosi amu Bispu Dioseze Baucau, Dom Basilio do Nacsimento,  no hafoin misa sei taka ho entrega Estátua Santa Teresinha do Menino Jesus no Estátua Jesus Misericordioso hosi sarani Suku Liaruka ba Sarani Suku Builale atu prepara fali festa Padroeira nian ba tinan 2021.

Hanesan baibain, kada tinan Parókia Ossú sempre selebra festa Padroeira Parókia nian ne’ebé monu iha loron 01 fulan Outubru hamutuk ho festa solenidade Santa Teresinha do Menino Jesus nian. Iha tinan sira uluk, ekipa Animadora sempre realiza atividade lubuk ida iha parte animasaun nian durante semana ida tomak ho Kermese (Pameran) no kompetisaun arte no kultura oin-oin hosi bairru, grupu kategoriál no eskola sira ne’ebé eziste iha Parókia Ossú.

Ba tinan ida ne’e, tanba ho Pandemia COVID-19 no deklarasaun Estadu Emenrjénsia hosi Prezidente Repúblika, ekipa animadora deside atu la realiza kermese ho kompetisaun ba arte no kultura sira. Ekipa animadora ne’ebé serbisu ho independente iha Pároku nia koordenasaun, deside atu realiza de’it “Noite Kulturál” ba iha dia 29-30 kalan, hahú hosi tuku 19.00 to’o tuku 22.00 OTL.

Objetivu prinsipál hosi “Noite Kulturál” ne’e atu anima parokianu tomak iha Parókia Ossú hodi komemora aniversáriu Parókia Ossú nian ba dala-83, atu fó oportunidade ba labarik no foinsa’e sira hodi dezenvolve “skill” no abilidade ne’ebé sira iha no atu muda mentalidade foinsa’e sira hosi hahalok violentu ba hahalok animadór nian.

Atividade ida ne’e realiza bazeia ba iha rezultadu enkontru ne’ebé ekipa animadora halo ho Pároku Ossú, Pe. Hipólito da Silva Soares, iha inísu agostu foin lalais. Atu realiza didi’ak atividade hirak ne’e, ekipa animadora mós halo ona enkontru koordenasaun seguransa nian ho Eskuadra Polísia Ossú no ho koordenadór Arte Marsiál sira ne’ebé eziste iha Ossú hodi asegura atividade ba kalan rua nian.

Kontribuidór: Memensio Sequeira Freitas

Editór: Cancio Ximenes

HAKEREK NO HATÁN

Please enter your comment!
Please enter your name here