Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (30/09). Imajen Tatoli/António Gonçalves

DILI, 30 setembru (TATOLI)-Governu liuhosi reuniaun Konsellu Ministru (KM) aprova alterasaun projetu dekretu-lei kona-ba partisipasaun Timor Gás no Petróleu, Empreza Públika (Timor GAP, E.P) fornese kombustível ba Eletricidade de Timor-Leste, Empreza Públika (EDTL,EP) hodi reforsa sentrál elétrika Hera no Betano.

Diploma ne’e aprezenta hosi Ministru Obra Públika, Salvador Eugênio Soares dos Reis Pires.

“Projetu dekretu-lei ne’e ho objetivu atu regula fornesimentu kombustível ho regulár no obrigatóriu hosi Timor GAP ba EDTL, nune’e permite fornesimentu nesesáriu ho seguru hodi bele mantein funsionamentu sentru produsaun eletrisidade,” dehan Ministru Prezidénsia Konsellu Ministru, Fidelis Manuel Leite Magalhães, hafoin reuniaun KM iha Palásiu Governu, kuarta ne’e.

Notísia Relevante: Governu deside Timor GAP partisipa fornese mina ba EDTL

Desizaun ezekutivu sira mensiona katak nu’udar empreza estatál, Timor GAP tenke fornese ho seguru no kumpre valór inklui espesifikasaun téknika bazeia kontratu.

Daudaun ne’e, empreza ne’ebé fornese mina ba sentrál elétrika Hera iha lote 1 maka MATO unipessoal, Lda ne’ebé halo konsórsiu ho Nikmat Mujur SDN hosi Malázia, hamutuk ho empreza Esperansa Timor-oan (ETO), enkuantu fornesimentu mina ba sentrál elétrika Betano maka empreza timor-oan SACOM.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here