Ministru Petróleu no Minerál, Víctor da Conceição Soares. Imajen Tatoli/Egas Cristovão

DILI, 25 setembru 2020 (TATOLI)-Primeiru-Ministru, Taur Matan Ruak, konvoka reuniaun ho Ministru Obra Públika, Salvador Eugênio Soares dos Reis Pires no Ministru Petróleu no Minerál, Víctor da Conceição Soares, hodi ko’alia kona-ba fornesimentu mina ba Eletricidade de Timor-Leste (EDTL).

Ministru Víctor relata, iha enkontru ne’e deside Timor Gás no Petróleu, Empreza Públika (Timor GAP, E.P) bele partisipa fornesimentu mina ba EDTL hodi reforsa sentrál elétrika Hera no Betano.

“Ha’u ho Ministru Obra Públika halo enkontru ho Primeiru-Ministru, relativa ho orientasaun Governu atu Timor GAP partisipa fornese kombustível ba EDTL, durante ne’e proposta mai beibeik iha reuniaun Konsellu Ministru no foin daudaun maka iha konkluzaun atu fó oportunidade ba empreza estatál ne’e partisipa iha fornesementu mina,” relata governante ne’e, hafoin enkontru iha Palásiu Governu, sesta ne’e.

Notísia Relevante: MOP-MPM koordena Timor GAP partisipa fornesimentu mina sentrál elétrika

Tuir desizaun katak empreza estatál ne’e sei fornese kombustível litru milliaun 35.

“Lote ida mak Governu deside hodi Timor GAP bele partisipa,  hanesan  empreza estatál tanba durante ne’e la halo nia misaun, tanba ne’e Primeiru-Ministru hanoin katak tenke halo negósiu loloos ho partisipasaun iha fornesementu mina,” nia akresenta.

Desizaun ne’e presiza deliberasaun liuhosi dekretu-lei ne’ebé sei diskute no aprova iha reuniaun Konsellu Ministru iha tempu besik.

Durante tinan barak nia laran, empreza privadu maka fornese mina ba sentrál elétrika rua.

Daudaun ne’e, empreza ne’ebé fornese mina ba sentrál elétrika Hera iha lote 1 maka MATO unipessoal, Lda ne’ebé halo konsórsiu ho Nikmat Mujur SDN hosi Malázia, hamutuk ho empreza Esperansa Timor-oan (ETO), enkuantu fornesimentu mina ba sentrál elétrika Betano maka empreza timor-oan SACOM.

Timor GAP kria bazeia ba dekretu-lei númeru 31/2011 loron 27 jullu, ne’ebé ho knaar halo atividade emprezariál, ezerse onshore no offshore iha rai-li’ur no rai-laran relativa ho peskiza no produsaun upstream (esplorasaun), inklui prestasaun serbisu.

Halo mós atividade emprezariál iha downstream (peskiza), inklui armazementu, refinasaun, prosesamentu, distribuisaun no venda petróleu ba derivadu sira, hanesan gás naturál ídrokarbunetu.

Halo mós atividade prosesamentu industriál ba petróleu no dezenvolvimentu ba atividade seluk hanesan petrokímika.

Alokasaun orsamentu ba Ministrériu Obra Públika (MOP) ba tinan fiskál 2020 hamutuk $195.423.435, ne’ebé montante ne’e inklui ona $158.357.031 ba provizaun despeza kombustível no manutensaun jeradór no liña transmisaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here