Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (02/09). Imajen Tatoli/Egas Cristovão

DILI, 02 setembru 2020 (TATOLI)-Liuhosi reuniaun Konsellu Ministru (KM), Vise-Ministra Finansa, Sara Lobo Brites, aprezenta tetu agregadu no dezagregadu ba Orsamentu Jerál Estadu (OJE) tinan 2021 ho valór biliaun $1,6, ne’ebé hetan ona aprovasaun hosi ezekutivu sira.

“Tetu fiskál OJE 2021 ho montante biliaun $1,6 sei kobre nesesidade no programa nasionál sira ne’ebé VIII Governu define ona, liuliu ba nível dezenvolvimentu kapitál sosiál no dezenvolvimentu ekonómiku, maibé aliñadu ho planu rekuperasaun ekonómika,” relata Ministru Prezidénsia Konsellu Ministru, Fidelis Manuel Leite Magalhães, hafoin reuniaun KM iha Palásiu Governu, kuarta ne’e.

Notísia Relevante: Governu define prioridade nasionál no tetu fiskál OJE 2021

Governante ne’e hatutan, orsamentu ne’e prevee mós ba dezenvolvimentu infraestrutura bázika fundamentál, dezenvolvimentu ambientál no mós ba prosesu reforma institusionál ne’ebé la’o hela.

Ministru ne’e informa, tetu OJE 2021 ne’e sei prelimináriu tanba faze tuirmai sei realiza Komisaun Revizaun Polítika Orsamentál (KROP) ho liña ministeriál hodi halo ajustamentu.

Antes ne’e, Governu realiza jornada orsamentál 2021 ho tema “orsamentu atu rekupera no hametin dezenvolvimentu” hodi define prioridade nasionál no determina tetu fiskál OJE 2021.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here