Prezidente Parlamentu Nasional, Aniceto Longuinhos Guterres Lopez. Imajen/Antonio Goncalves.

DILI, 29 setembru 2020 (TATOLI)—Parlamentu Nasionál hahú diskute orsamentu privadu Parlamentu Nasionál (PN) ba 2021 hamutuk $16.984.066 no hosi montante ne’e $3.000.000 prevee harii edifísiu própriu Parlamentu Nasionál nian.

“Orsamentu millaun $16-resin ne’e inklui ona kapitál dezenvolvimentu millaun $3 atu halo edifísiu Parlamentu Nasionál ninian, sein (la inklui) kapitál dezenvolvimentu parlamentu nia osan $13.984.066,” Prezidente Parlamentu Nasionál, Deputadu Aniceto Longuinhos Guterres Lopes, informa liuhosi plenária Parlamentu Nasionál, tersa ne’e.

Ba oras ne’e daudaun orsamentu privativu ne’e hahú diskusaun iha plenária iha faze jeneralidade hafoin tama ba faze espesialidade.

Entretantu, tetu fiskál 2021 ne’ebé Parlamentu Nasionál simu hosi Ministériu Finansa iha loron 7 setembru 2020 hamutuk $13.984.066 maibé aumenta tán ho millaun $3 atu harii edifísiu Parlamentu Nasionál nian hamutuk $16.984.066. Oras ne’e daudaun orsamentu privadu Parlamentu Nasionál hahú hala’o diskusaun

Hosi orsamentu $16.984.066 ne’e fahe ba saláriu no vensimentu $5.581.083, bens no servisu $6.250.029, kapitál minór $492.796, kapitál dezenvolvimentu $3.000.000 no transferénsia públika $1.462.000.

Hosi kategoria saláriu no vensimentu $5.581.083 ne’e sei selu saláriu no vensimentu, oras estraordinária sira no oras ekstra. 

Hosi parte kategoria bens (sasán) no servisu $6.250.029 prevee ba viajen lokál, viajen estranjeiru, formasaun profisionál no semináriu, emcargos com instalações, arrendamentu ba propriedade, kombustível ba operasaun veíkulu, manutensaun veíkulu, seguros, rendas e serviços, materiál no fornesimentu operasionál, kombustível ba jeradór, manutensaun ba ekipamentu no edifísiu, serbisu operasionál, asisténsia téknika, servisu tradusaun, servisu diversu sira seluk, pagamentu kuota no servisu catering.

Hosi parte kapitál minór prevee ba kompra veíkulu, ekipamentu informátika, ekipamentu seguransa, ekipamentu ba komunikasaun parlamentu nian, ekipamentu diversu sira seluk, mobiliáriu, ekipamentu sira seluk kona-ba eskritóriu no ekipamentu água.

Hosi parte kapitál dezenvolvimentu prevee ba infraestrutura ativu sira, servisu no akipamentu menores no kategoria transferénsia sei hala’o pagamentu ba pesoál sira no konsesaun públika.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here