Ministru Edukasaun Juventude no Desportu, Armindo Maia.Imajen/Antonio Goncalves

DILI, 29 setembru 2020 (TATOLI)-Ministru Edukasaun Juventude no Desportu (MEJD), Armindo Maia, promete sei rezolve destinu profesór voluntáriu hamutuk na’in 17 iha Eskola Ensinu Sekundáriu Jerál Dom Carlos Filipe Ximenes Belo, Postu Administrativu Kelikai, Munisípiu Baucau.

Kazu ne’e akontese komesa kedas Governasaun anteriór ne’ebé lidera husi eis Ministru António da Conceição, maibé to’o agora seidauk rezolve.

Notísia Relevante :Profesór 15 hosi ESG Dom Carlos seidauk asina kontratu

“Dokumentu profesór na’in 17 iha eskola ne’e ami simu ona husi Komisaun G PN, maibé afinal dokumentu sira ne’e mai kedan iha tempu eis Ministru António da Conceição nian,” dehan, Governante ne’e ba Tatoli iha Otél Novo Turizmu, tersa ne’e.

Nia dehan simu dokumentu hirak ne’e husi Komisaun G Parlamentu Nasionál ne’ebé trata asuntu edukasaun durante halo audénsia públika kona-ba proposta orsamentu jerál estadu 2020 nian foinlalais ne’e iha Parlamentu Nasionál.

“Buat ne’ebé ita bele apoiu ita fó no buat ne’ebé ita labele karik ita-nia kbi’it mak nune’e. maibé ita neineik buka rezolve took buat sira ne’e,” nia hateten.

Iha parte seluk, Prezidente Komisaun G ne’ebé trata Asuntu Edukasaun Juventude Kultura no Sidadania, António Verdial, husu ba Governu atu rezolve kestaun ne’e.

“Ita tenki agradese ba sira nia espíritu serví ba ita-nia oan sira tan ne’e laiha razaun Governu la atende dokumentu ne’ebé mak ita-nia profesór voluntáriu sira ne’e hato’o ona,” nia dehan.

Jornalista : Tomé Amado

Editór : Agapito dos Santos

HAKEREK NO HATÁN

Please enter your comment!
Please enter your name here