Koordenadór ESG Dom Carlos Filipe Ximenes Belo, Carlos Ximenes Filipe. Imajen TATOLI/Evaristo Soares Martins.

DILI, 18 setembru 2020 (TATOLI)—Profesór na’in 15 hosi Ensinu Sekundária Jerál (ESG-sigla portugés) Dom Carlos Filipe Ximenes Belo, Postu Administrativu Quelicai, Munisípiu Baucau, hanorin ona durante tinan-hitu (7) maibé to’o agora seidauk asina kontratu hosi Ministériu Edukasaun (ME).

Profesór hirak ne’e, ohin, halo audiénsia ho Prezidente Parlamentu Nasionál Deputadu Aniceto Longuinhos Guterres Lopes, hodi informa sira-nia kondisaun ne’e tanba durante tinan-hitu (7) hahú hosi 2013 maibé Governu liuliu Ministériu Edukasaun seidauk toma atensaun. 

“Problema nia hún ne’e mak liuliu liga ba iha profesór na’in-15 tanba eskola Governu rekoñese ona maibé profesór sira-ne’ebé hanoin durantu tinan-hitu (7) nia laran ona maibé Ministériu Edukasaun seidauk rekoñese,” Koordenadór ESG Dom Carlos Filipe Ximenes Belo, Carlos Ximenes Filipe, informa ba jornalista sira hafoin halo audiénsia ho PPN Aniceto Guterres, sesta ne’e.

Koodenadór ne’e haktuir, Ministeriu Edukasaun halo promesa dala barak ona maibé realidade seidauk iha rezultadu, tanba iha loron 26 setembru 2016 liuba Ministru Edukasaun haruka ami mai iha INFORDEPE ho mós prezensa Amo Bispu Dom Carlos Filipe Ximenes Belo SBD iha INFORDEPE.

Iha momentu ne’e, ME halo promesa ba haruka profesór na’in-15 atu asina kontratu maibé realidade la asina kontratu haruka fila-fali ba Baucau.

Nune’e mós, nia hateten, iha loron 15 fulan-jullu, ME fó orientasaun ba profesór sira atu loke konta bankária no sira loke duni konta bankária maibé realidade la asina kontratu no konta bankária mós mamuk hela nafatin.

Iha faze datoluk nian, tuir nia, ekipa re-verifikasaun hosi ME ba iha eskola refere iha 16 fulan-agostu hodi dehan profesór na’in-15 ne’e prenxe ona rekezitu sira, hein de’it atu asina kontratu maibé iha loron 19 fulan-dezembru 2019 profesór sira la asina kontratu tanba iha lista Munisípiu Baucau ne’e totál profesór tama lista definitivu na’in-29 maibe na’in 14 asina no na’in 15 la asina.

“Loloos ne’e diferensa iha-ne’ebe mak profesór na’in 14 asina no na’in 15 ne’e  la asina fal. Maibé, loloos ne’e diretór edukasaun Munisípiu Baukau foti desizaun hodi haruka profesór na’in-14 mak halo asinatura no na’in-15 seluk la asina,” Koodenadór ESG Dom Carlos ne’e haktuir.

Ho problema ne’e, koordenadór ho professor na’in-15 ne’e husu ba reprezentante povu iha uma fukun Parlamentu Nasionál atu husu ba ME atu bele halo justifikasaun ba asuntu ida-ne’e iha plenária.

Hatán kona ba problema ne’e, Prezidente Komisaun G ne’ebé trata asuntu Edukasaun, Juventude, Kultura no Siadadania, Deputadu António Verdiál de Sousa, hateten hanesan reprezentante povu iha uma fukun ne’e sei tau-matan ba povu nia halerik ne’e.

“Preokupasaun profesór sira-nian ne’e la’os foin maibé la’o kleur tebes ona. Klaru katak hanesan deputadu, labele ultrapasa Governu ka ezekutivu nia serbisu. Maibé, Parlamentu Nasionál iha dever tomak atu hatutan profesór sira-nia halerik ne’e ba iha Governu, liuliu ba iha Ministériu Edukasaun, Juventude no Kultura atu trata asuntu refere iha tempu badak nia laran,” Prezidente Komisaun G ne’e promete.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here