Segundu Komandante Polisia Munisipiu Dili, Superintendente, Euclides Belo. Imajen/Eugénio Pereira

DILI, 28 setembru 2020 (TATOLI)- Iha semana ne’e, hosi loron 20 to’o loron 28 setembru 2020, Polísia Munisípiu Dili, rejista kazu krime hamutuk 41 no Polísia detein ema na’in-10 ne’ebé deskonfia autór ba kazu krime hirak ne’e.

Notísia Relevante : Relatóriu Polísia, ema na’in-48 mate tanba asidente tráfegu

 “Ita rejista kazu krime hamutuk 41 ho tipu krime ne’ebé aas liu maka ofensa integridade fízika simples boot liu, tuir fali maus tratu ba konjuga ne’e rejistu iha lima, danu simples ne’e lima no kazu seluk tan jogu ilísitu ilegál, no suspeitu ne’ebé PNTL detein ne’e hamutuk ema na’in-10,” informa Segundu Komandante Polísia Nasionál Timor (PNTL) Munisípiu Dili, Superintendente, Euclides Belo, ohin, liuhosi konferénsia imprensa iha Komandu PNTL, Caicoli, Dili.

Hosi kazu sira ne’ebé rejista, PNTL aprezenta ba Ministériu Públiku prosesa kazu iha Tribunál tuir lei no Tribunál fó desizaun ba kazu balun fó koasaun ba administrasaun iha kazu rua, no suspeitu sira selu multa hamutuk $105.

Suspeitu na’in-10 ne’ebé PNTL detein, sira nia kazu aprezenta ba tribunál deside tuir lei fó liberdade ba suspeitu ida, maibé tenke aprezentasaun periódika. Alende ne’e, suspeitu na’in-tolu nia kazu mós hetan liberta hosi Ministériu Públiku, no suspeitu seluk tan hetan liberdade hosi tribunál sein medida koasaun ruma.

Segundu Komandante Euclides Belo hatutan, tuir rezultadu investigasaun PNTL nia haree, maioria problema sira ne’ebé akontese envolve joven ne’ebé gosta konsume ka hemu tua maka hamosu problema.

“Ami husu para joven sira karik hemu tua tenke kontrola aan no hemu iha fatin ne’ebé seguru para labele hamosu problema no prejudika orden públiku,” Euclides Belo hateten.

Atu antesipa kazu ne’e labele akontese beibeik, PNTL liuhosi Ofisiál Polísia Suku (OPS), Konsellu Polisiamentu Komunitáriu (KPK) servisu maka’as ho autoridade suku sosializa dame no prevensaun konflitu ba populasaun iha bairru hotu- hotu.

Alende ne’e, PNTL mós halo patrullamentu la’o ain tama-sai bairru no patrullamentu rutina ho karreta.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here