Asidente tráfegu iha área Raicotu, Tasi-Tolu, Dili, rezulta vítima Santiago Marcelo husi Suku Aiasa, Postu Administrativu Bobonaro, Munisípiu Bobonaro mate iha fatin. Imajen Tatoli/Dok.

DILI, 25 setembru 2020 (TATOLI)- Tuir dadus estatístika hosi Komandu Polísia Nasionál Timor-Leste (PNTL) durante periodu fulan janeiru to’o setembru, tinan ne’e, ema na’in-48 mak mate tanba asidente tráfegu.

Notísia Relevante : Ema na’in-rua mate tanba asidente tráfegu no na’in-rua tara-aan

Relatóriu Polísia nian ne’e aprofunda katak maioria vítima sira ne’ebé lakon sira-nia vida ne’e menoridade ne’ebé kondús motor ho velosidade to’o enfrenta asidente karreta soke motor, motor soke motor no motor soke karreta.

 “Vítima menoridade sira barak mate tanba kondús Honda Beat   ne’ebé halai ho velosidade,” informa portavós PNTL, Superintendente Xefe, Arnaldo de Araújo ba jornalista, ohin, liuhosi konferénsia imprensa iha Kuartél Jerál PNTL, Caicoli, Dili.

Atu evita númeru asidente tráfegu ne’e iha territóriu Timor-Leste, Komandu PNTL orienta Departamentu Seksaun Tránzitu Rodoviáriu hodi halo pasa revista maka’as ba movimentu transporte públiku hodi kumpre lei no sinais tránzitu sira. Liuliu haree mós dokumentu transporte sira-nian no karta kondusaun motorista sira-nian.

Alende ne’e, durante  loron 15 too loron 21 Setembru 2020, PNTL rejista mós kazu violénsia no krime oin-oin hamutuk 41 maka akontese iha Timor-Leste.

Kazu sira ne’ebé akontese, PNTL halo tiha investigasaun aprezenta ba Ministériu Públiku, no kazu balun rezolve tuir dalan família entre vítima no suspeitu sira ne’ebé fasilita hosi autoridade suku no PNTL.

PNTL rejista mós kazu maun-alin na’in -ua mate iha Munisípiu Lautem bainhira hamoos hela tanki mina hosi Kompañia Aceil Atroice Fuel.

“Ita nia alin na’in-rua ne’e sira tun ba hamoos tanki mina nian, maibé tanba laiha sirkulasaun anin iha tanki laran maka rezulta sira mate,” nia hateten.

Komandu PNTL liu hosi Unidade Patrullamentu Fronteira (UPF), Unidade Espesiál Polísia (UEP), Unidade Polísia Marítima (UPM) no Komandu FALINTIL-Forsa Defeza Timor-Leste (F-FDTL) detein mós sidadaun na’in-11 kompostu  husi Timor-oan na’in-ualu no Indonézia na’in-tolu ne’ebé halo atividade negósiu ilegál  iha liña fronteira terrestre.

Autór hira ne’e autoridade seguransa entrega ekipa ba COVID-19 Ministériu Saúde hodi submete ba konfinamentu obrigatóriu iha Batugade no remata tiha sei entrega ba PNTL Bobonaro hodi kontinua prosesu investigasaun.

 Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here