Joven partisipa iha kampaña nasionál, iha Largo Lecidere, sesta (18/09). Imajen Tatoli/António Gonçalves

DILI, 18 setembru 2020 (TATOLI)–Governu liuhosi Sekretaria Estadu Komunikasaun Sosiál (SEKOMS) hamutuk ho entidade kompetente sira lansa kampaña nasionál kontra hoax no promove internet saudável.

Atividade ne’e hahú ho marsa hamutuk ho Sekretáriu Estadu komunikasaun Sosiál, Merício Juvinal dos Reis ‘Akara’ ho entidade sira hosi Palásiu Governu to’o Largo Lecidere, ne’ebé durante la’o ain partisipante sira hetan animasaun hosi banda hosi São Miguel Arcanjo.

Estudante sira partisipa marsa hosi Palásiu Governu to’o Largo Lecidere, hanesan kampaña nasionál kontra hoax no internet saudável ne’ebé organiza hosi SEKOMS, iha, sesta (18/09). Imajen Tatoli/António Gonçalves

Iha diskursu, Sekretáriu Estadu Akara hateten objetivu lansamentu kampaña nasionál ne’e atu eduka sidadaun sira labele lansa hoax hodi estraga ema seluk nia onra no uza internet sai reférensia.

“Ita konsidera lia falsu ka hoax sai ameasa mós ba ita, liuliu tanba sidadaun seidauk iha konxiénsia, entaun kualker informasaun ita konsumu liuhosi fahe informasaun atu hatún no dezakredita ema no dalaruma bainhira la kuidadu bele destroi ita-nia relasaun iha sosiedade,” governante ne’e dehan durante kampaña nasionál iha Largo Lecidere, sesta ne’e.

Notísia Relevante: Aban, SEKOMS realiza kampaña nasionál hoax no promove internet saudável

Nia nota katak dala barak hoax ne’ebé lansa hosi rede sosiál hanesan Facebook bele destroi unidade hosi sosiedade nian leet to’o nasaun tomak.

“Governu iha preokupasaun boot ba asuntu ne’e, tanba ho era dijitalizasaun hanesan agora sidadaun sira iha tinan lima ka sanulu oin mai bele halo hanesan kultura ida. Uluk ema ko’alia amesa ba nasaun ne’e hanesan ameasa konvensionál no ho kilat, maibé ameasa ida ita la sente tanba tama iha kakutak no influénsia hodi ladún funsiona ho di’ak, nakonu ho enerjia negativu.” nia akresenta.

Sekretáriu Estadu komunikasaun Sosiál, Merício Juvinal dos Reis ‘Akara’. Imajen Tatoli/António Gonçalves

Tanba ne’e, membru ezekutivu ne’e konsidera tempu ona atu kombate hoax liuhosi promove internet saudável.

“Ha’u hakarak aumenta promove internet saudável, tanba la’ós ona tempu ita atu hamate internet no la’ós ita-nia kompéntensia hamate Facebook, ka la’ós ona tempu atu hamate plataforma sira ne’e, maibé tempu ita-nian maka prepapa-an atu uza internet ho forma pozitivu hanesan baixa livru siénsia no vídio edukativu atu inspira joven halo planu iha vida di’ak liután,” nia subliña.

SEKOMS husu kontribuisaun joven kombate hoax

Oportunidade ne’e, SEKOMS husu kontribuisaun komunidade, liuliu joven atu ajuda Governu kombate hoax.

“Halo favór kombate hoax, tanba hoax ne’e hanesan veneno ba ita-nia kakutak no bele ameasa ita-nia an no unidade iha sosidade nia leet,” nia haklaken.

Komunidade partisipa iha kampaña nasionál kontra hoax no internet saudável ne’ebé organiza hosi SEKOMS, iha Largo Lecidere, sesta (18/09). Imajen Tatoli/António Gonçalves

Fatin hanesan, Prezidente Autoridade Nasionál Komunikasaun (ANC, sigla portugés), João Oliveira Freitas, hateten kona-ba kontiúdu hoax parte autoridade hahú halo kontrolu no kontinua esforsu atu serbisu hamutuk ho operadór telekomunikasaun sira atu kombate.

Maibé, nia husu partisipasaun komunidade, liuliu joven atu kontribui hanoin di’ak nune’e bele kontribui kombate hoax ne’ebé lansa iha rede sosiál.

“Ha’u husu ba Timor-Leste nia di’ak, ita hotu evita soe lia falsu iha rede sosiál no hamutuk tau hanoin di’ak atu dezenvolve ita-nia rai,” Prezidente ANC alerta.

Diretór Polísia Sientífika Investigasaun Kriminál (PCIC, sigla portugés), Vicente Fernandes Brito, apoiu tomak ba inisiativa SEKOMS tanba serbisu órgaun polisiál ne’e porsaun boot ba prevensaun.

“Dalaruma ami konsege identifika identidade falsu ne’ebé uza rede sosiál ba buat negativu no bolu hodi investiga, maibé hanesan kestaun adminisrativa polisiál de’it tanba difamasaun juridikamente la’ós krime,” nia dehan.

Tuir nia, internet hanesan meiu komunikasaun ne’ebé ponderozu no indispensável.

“Ema uza internet saudável hodi aprende no halo peskiza sientífiku hodi hetan lukru ekonómiku,” nia akresenta.

Nune’e mós, Reprezentante Amu Bispu Dioseze Dili, Padre Bento Barros, apresia inisiativa Governu.

Reprezentante Amo Bispo Dioceze Dili, Padre Bento Barros

“Ami apresia inisiativa Governu ba kampaña nasionál kontra hoax no promove internet saudável ” Padre Bento informa.

Nia husu públiku atu uza internet ho konxiénsia tanba mundu dijitál ne’e bele halakon ema-nia konxiénsia no responsablidade ba uza rede sosiál.

Entretantu, lansamentu ba kampaña nasionál dahuluk kontra hoax no promove internet saudável ne’e partisipa hosi ekipa SEKOMS, Prezidente interinu Agência Tatoli Manuel Pinto, Diretór Agência Tecnologia da Informação e Comunicação (TIC) TIMOR I.P, Roberto Caetano de Sousa, reprezentante igreja katólika, estudante sira inklui entidade sira seluk.

Iha seremónia nia rohan, Sekretáriu Estadu Akara hamutuk ho konvidadu sira asina kuadru nu’udar jestu kompromisu kombate hoax.

Eventu ne’e hetan animasaun hosi grupu banda múzika nasionál, The Kraken no partisipa másimu hosi komunidade.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here