Sekretáriu Konsellu Superiór PNTL, Superintendente Xefe Carlos Jerónimo, Imajen Tatoli/Eugénio Pereira

DILI, 28 setembru 2020 (TATOLI)- Konsellu Superiór Polísia Nasionál Timor-Leste (KS-PNTL), iha Kuartél Jerál PNTL, Caicoli, Dili,  halo reuniaun koordenasaun hodi fahe hanoin kona-ba proposta demisaun ba membru PNTL na’in -lima (5) ne’ebé komete irregularidade iha sira-nia knaar loro-loron nian.

Notísia Relevante : Ministru Interiór Mak iha Kompeténsia Demite Membru PNTL Indixiplina

Sekretaria Konsellu Superior Superintendente Xefe Carlos Jeronimo hateten, Gabinete Inspesaun Jerál (GIG) halo enkontru Konsellu Superior datoluk iha tinan 2020 hodi haree kona-ba prosesu dixiplinár liu-liu ba kazu lima (5).

Entre kazu lima ne’e iha kazu tolu (3) maka komandante sira fó opiniaun atu halo demisaun enkuantu kazu rua seluk sei haree fila-fali.

Sekretaria Konsellu Superior Superintendente Xefe Carlos Jeronimo, informa, prosesu demisaun tolu (3) sei hato’o ba Ministru Interiór hodi deside, tamba Konsellu Superiór bele fó opiniaun de’it, maibé desizaun tomak kona-ba demisaun Ministru Interiór mak sei hasai.

“Kazu haat ne’e maka falta servisu (devér e seriedade), kazu ró iha Atabae sei haree fila-fali nia prosesu no kazu ida seluk kona-ba membru Unidade Patrullamentu Fronteira (UPF) fó apoiu fali ba ema balu halo tranzasaun ilegál sei haree no sei estuda no haree fila-fali didi’ak hanesan Konsellu nian hodi prepara fali depois submete proposta ba Komandante Jerál,” informa Superintendente Xefe Carlos Jeronimo, liuhosi karta komunikadu imprensa ne’ebé Agênsia Tatoli asesu hosi Komandu PNTL, ohin.

Prezidente Konsellu Superiór hato’o katak durante ne’e iha kazu barak maka deside tiha ona kuaze kazu 80, enkuantu kazu lima (5) ne’e hato’o mai prosesu dixiplinár ba demisaun nian, maibé hafoin liuhosi reuniaun deside katak kazu ida (1) sei estuda, ida seluk lae (livre) no kazu tolu (3) maka prosesu ba demisaun.

Membru ne’ebé maka sei hetan demisaun ho nivel postu sarjentu no ajente no sira-nia naran rasik Komandu PNTL seidauk bele fó sai.

“Prosesu kazu hirak ne’e balu liuhosi Komandante Unidade halo prosesu disiplinár hanesan bai-bain no depois sira-nia kompeténsia tuir lei to’o de’it parte balun no parte balun tenke hato’o mai Komandu Jerál liuhosi Departamentu Justisa Nasionál analiza fali prosesu ne’e tomak hodi prepara hato’o ba Komandante Jerál hodi husu Komandante Jerál hato’o mai Inspesaun Jerál hodi prepara reuniaun Konsellu Superiór,” nia esplika.

Nia hatutan, bainhira iha ona prosesu demisaun sira bele hasai membru ne’e para servisu hanesan membru PNTL tuir lei, maibé lei fó dalan kuandu sai tiha maka hato’o rekursu ba Tribunál hodi prosesu hanesan sidadaun no bainhira manan iha prosesu ne’e maka membru ne’ebé maka hetan ona demisaun fila-fali hala’o nia knaar tuir lei.

Reuniaun Konsellu Superiór ne’e prezide hosi Komandante Jerál akompaña hosi Segundu Komandante Jerál no partisipa husi Komandante munisípiu 12, inklui Rejiaun Administrativu Espesiál Oe-Cusse Ambeno (RAEOA) no Komandante Unidade sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here