Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 26 agostu 2020 (TATOLI)-Ministériu Obra Públika (MOP) no  Ministériu Petróleu no Minerál (MPM) hahú halo reuniaun koordenasaun atu empreza estatál hanesan Timor GAP, ep bele partisipa fornesimentu mina ba sentrál elétrika iha Hera no Betano.

Enkontru koordenasaun ne’e bazeia ba orientasaun Primeiru-Ministru, Taur Matan Ruak atu empreza estatál ne’e la’ós ativu de’it iha downstrem (tasi laran), maibé mós presiza ativu ona iha atividade upstream (rai-maran), liuliu ba fornesimentu mina iha sentrál elétrika sira.

Tanba ne’e, iha tersa (25/08), Ministru Petróleu no Minerál, Víctor da Conceição Soares, akompaña hosi Prezidente Konsellu Administrasaun ba Timor GAP, António José Loiola de Sousa, realiza enkontru koordenasaun ho Ministru Obra Públika, Salvador Eugênio Soares dos Reis Pires.

“Ami hahú diskute servisu koodenasaun atu Timor Gap hanesan kompañia estatál Estadu Timor-Leste nian bele partisipa iha fornesimentu kombustível ba sentrál elétrika sira. Tuir orietasaun Primeiru-Ministru ba Ministru Petróleu no Minerál, komunika mai ha’u katak Timor-GAP hakarak hola parte iha fornesimentu kombustível ba sentrál elétrika sira,” tenik Ministru Salvadór iha Pálasiu Governu, kuarta ne’e.

Notísia Relevante: PM husu Timor GAP partisipa fornesimentu mina iha sentrál elétrika

Tuir governante ne’e, ministériu rua haree no analiza lei balun ne’ebé viabiliza ba fornesimentu ne’e, bele avansa no laiha objesaun.

Antes ne’e, hafoin hasoru malu ho Xefe Governu, Ministru Víctor hateten Primeiru-Ministru, Taur Matan Ruak hakarak Timor GAP bele halo investimentul iha rai laran, liuliu partisipa iha atividade downstream atubele hetan retornu no hatama ba kofre Estadu.

“Primeiru Ministru husu Timor GAP tenke halo investimentu reál iha rai-laran, ne’ebé posibilidade tenke partisipa iha downstream liuliu kona-ba fornesimentu mina ba Eletricidade de Timor-Leste (EDTL) no mós planu Governu atu sentrál elétriku sira konverte petróleu ka gazoél ba gás ba sentrál elétrika sira,” Ministru subliña.

Daudaun ne’e, empreza ne’ebé fornese mina ba sentrál elétrika Hera iha lote 1 maka MATO unipessoal, Lda ne’ebé halo konsórsiu ho Nikmat Mujur SDN hosi Malázia, hamutuk ho empreza Esperansa Timor-oan (ETO), enkuantu fornesimentu mina ba sentrál elétrika Betano maka empreza timor-oan SACOM

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here