Ekipa Fiskalizasaun Konjunta (EFK) hala’o asaun represivu hodi foti obrigatóriu karreta Estadu ida husi eis funsionáriu kontratadu iha Ministériu Edukasaun (ME), Lindo Mendonça da Silva. Dili, 25 setembru 2020. Imajen Tatoli/Nelson de Sousa

DILI, 25 setembru 2020 (TATOLI)-Ekipa Fiskalizasaun Konjunta (EFK),  ohin, hala’o  asaun represivu hodi foti obrigatóriu karreta Estadu ida husi  eis funsionáriu  kontratadu  iha Ministériu Edukasaun (ME), Lindo Mendonça da Silva,  tanba deskonfia durante ne’e rekuza kolabora ho Diresaun Lojístika Ministériu Edukasaun atu voluntáriamente entrega karreta Estadu.

Notísia Relevante : Ekipa Konjunta Halo Apreensaun Ba Motór Estadu Iha MAE

Ekipa Fiskalizasaun Konjunta  ne’e kompostu hosi Komisaun Anti-Korrupsaun (CAC), Polísia Nasionál Timor-Leste (PNTL), Komisaun  Funsaun Públika (CFP), Diresaun Nasionál Transporte  no Terrestre (DNTT), Diresaun Nasional  Patrimóniu  Estadu (DNPE) no ofisial Ministériu Edukasaun.

Iha asaun represivu ne’e ekipa sira tun direita ba eis funsionáriu ne’e  nia rezidénsia iha Postu Administrativu Kristu  Rei, Munisípiu Díli, nu’udar kontinuasaun husi servisu ekipa nian atu rekolla hotu patrimóniu Estadu nian ne’ebé ema ka entidade Estadu  balun uza ba interese privadu.

Pontu vokál   CAC, Euclides Vidal Madeira, ba jornalista hafoin remata asaun represivu ne’e, informa, karreta ho marka Pajero no númeru matrikula 20.414 TL  ne’e patrimóniu doasaun husi Banku Mundial ba Ministériu Edukasaun iha tinan 2003-2005 liu ba ne’ebé funsionáriu sira uza ba hala’o servisu Estadu nian.

Patrimóniu hirak ne’e rejista ona Diresaun Patrimóniu Estadu, Ministériu Finansa (MF) no oras ne’e EFK kontinua hala’o servisu rekollamentu ba patrimóniu Estadu hirak-ne’e iha utilizadór sira-nia liman.

Tuir lista ne’ebé iha doasaun karreta husi Banku Mundial nian lubuk ida ba ME no parte  ekipa rekolla hotu ona no hela ida mak seidauk,  nune’e tuir  planu atividade EFK nian parte lokraik sei  rekolla  tan hodi termina ona.

EFK apela ba eis-funsionáriu ME sira ne’ebé sei kontinua utiliza karreta Estadu nian doasaun husi Banku Mundial atu entrega voluntáriamente  kuandu la entrega sei simu konsekuénsia tuir lei.

Lindo Mendonça da Silva, hateten, nia parte  nu’udar eis funsionáriu kontratadu iha Ministériu Edukasaun no karreta refere hetan doasaun husi Banku Mundial iha tinan 2000-2015, no nia utiliza hala’o servisu ba projetu konstrusaun eskola ensinu báziku iha territóriu laran, maibé lato’o tinan 2015 karreta refere hetan avaria no laiha osan atu hadi’a nune’e hetan avaria to’o mai agora.

“Ha’u durante ne’e koopera atu entrega fila-fali karreta ne’e, maibé sira la mai entaun husik para iha ne’e de’it   no ohin sira mai atu foti ha’u koopera hodi entrega hikas,” hateten Lindo Mendonça da Silva.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here