Operasaun Konjunta ne'ebé inisia hosi CAC ba veíkulu Estadu ne’ebé halo movimentu iha loron ferias, sábadu ho domingu. Imajen/Dok. CAC

DILI, 17 jullu 2020 (TATOLI)- Ekipa konjunta ba operasaun viatura Estadu, kompostu hosi Komisaun Anti Korrupsaun (CAC), Diresaun Nasionál Patrimóniu Estadu (DNPE), Diresaun Nasionál Transporte no Terrestre (DNTT) no Polísia Nasionál Timor-Leste Seksaun Tránzitu Dili, ohin, reativa hikas operasaun hodi halo apreensaun ba motór Estadu  ida ho marka Kawasaki KLX Xapa Matríkula 2129 GA iha Ministériu Administrasaun Estatál (MAE).

Notísia Relevante: Sei Re-Ativa Operasaun Ba Veíkulu Estadu iha Loron Feriadu

Pontu vokál CAC, Euclides Vidal Madeira, informa katak, atividade operasaun reativa ne’e realiza hodi kumpre karta sirkulár Governu Timor-Leste nian hodi kontrola viatura Estadu.

Operasaun ne’e foin reativa fila-fali, tanba iha fulan kotuk durante implementasaun Estadu Emerjénsia (EE) atividade operasaun ne’e la’o paradu tiha.

“Ohin, ita reativa fila-fali atividade operasaun ba viatura Estadu nian ne’ebé funsionáriu balun utiliza fora hosi oras servisu. La’ós de’it iha Ministériu Administrasaun Estatál, maibé mós liña ministériu ne’ebé ita identifika ona,” informa Euclides Vidal, ohin, ba jornalista iha edifísiu MAE, Dili.

Nia hatutan, Diresaun Nasionál Patrimóniu Estadu (DNPE) rasik rekolla ona lista karreta no motór Estadu barak sei rekolla iha tempu besik.

Nia dehan, motór Estadu ida ne’ebé ekipa halo apreensaun iha MAE nota durante ne’e iha funsionáriu kargu xefia balun uza fali ba atividade privadu durante tinan ida ona, tanba ne’e ekipa ba foti motór ne’e hodi lori ba DNPE hodi haree ninia prosesu.

“Motór ne’e diretór ida maka uza, depois la lori ba MAE, tanba ne’e maka mai foti,” Euclides Vidal Madeira tenik.

Tuir planu, iha tempu besik ekipa sei halo mós apreensaun ba karreta Estadu no motór iha liña ministériu balun.

CAC rasik hosu atu kualkér kargu xefia no funsionáriu sira ne’ebé uza patrimóniu Estadu atu koopera ho ekipa hodi entrega viatura Estadu nian tuir lei.

Parte seluk, ekipa konjunta mós kontinua koopera ho PNTL hodi halo operasaun ba viatura Estadu uza la iha guia de marsa halo viajen iha loron feriadu, sábadu no domingu.

Iha fatin hanesan, Segundu Komandante Polísia Munisípiu Dili, Superintendente Asistente Xefe, Euclides Belo, hateten, PNTL prontu koopera nafatin hodi halo operasaun ba viatura Estadu nian.

Nia hatutan, durante ne’e PNTL ativu tebes koopera ho ekipa konjunta halo operasaun iha tempu loron no kalan.

 Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here