DILI, 24 setembru 2020 (TATOLI)-Proposta orsamentu Jerál Estadu (OJE) tinan fiskál 2020, Ministériu Interior (MI) prevee besik millaun $50 hodi foku ba selu dívida balun iha ministériu no iha Polísia Nasionál Timor-Leste (PNTL), inklui responde ba nesesidade família vítima dezastre naturaís hamutuk 6,000 -esin ne’ebé sira nia hela fatin hetan afetadu.
Notísia Relevante : MJ prevee millaun $11,609,323 iha proposta OJE 2020
“Iha Dotasaun Orsamentu Temporáriu (DOT) husi janeiru mai to’o daudaun, kontempla ho proposta OJE 2020 nian, Ministériu Interior prevee $13,759,432 no ba PNTL $32,230,387, nune’e ita konta hamutuk besik millaun $50,” hateten Vise Ministru Interior, António Armindo, hafoin hala’o audiénsia ho komisaun B Parlamentu Nasional kona-ba aprezentasaun proposta OJE 2020 nian husi MI ,ohin, iha Parlamentu Nasionál.
Nia deskreve katak husi orsamentu Ministériu Interior no parte Polísia Nasionál Timor-Leste (PNTL) exesaun sura husi rejime duodecimal, tanba ne’e iha proposta OJE 2020 iha osan balun prevee tan hodi kobre de’it ba iha fulan rua to’o ba iha loron 31 dezembru tinan ne’e.
“Ezekusaun DOT Ministériu Interior ezekuta ona porsentu 64% no PNTL nian ezekuta 60%,” hateten Vise Ministru António Armindo.
Nia garante proposta OJE 2020 ba ezekusaun tempu badak ne’e sei prioridade maka’as liu hodi selu dívida barak liu mai husi tinan 2015 hanesan, dívida ba manutensaun, fardamentu, botas, kombustivel, fornesimentu internet no pulsa husi Timor Telecom, responde nesesidade família vítima dezastre naturaís no dívida hirak ne’e barak liuhusi PNTL purvolta millaun $2-resin.
Proposta OJE 2020 ba Ministériu Interior nian $13,759,432 koloka ba iha saláriu vensimentu $5,980,755, bens servisu $5,878,678, transferénsia públika $1,900,000 no ba kapitál menór no kapitál dezenvolvimentu laiha.
Husi orsamentu ne’e ba fahe ba diresaun Seguransa Patrimóniu Estadu $2,597,710, Servisu Migrasaun $808,016, Programa Prevensaun Konflitu Komunitáriu $120,097, Protesaun Sivíl no Servisu Bombeiru $7,150, Boa Governasaun Jestaun Institusionál $845,682, Jestaun Risku Dezastre $3,708,919, saláriu vensimentu $5,671,858.
Proposta OJE 2020 ba PNTL nian hamutuk $32,230,387 koloka ba saláriu vensimentu $16,640,508 , bens servisu $15,349,879, kapitál menór $240,000, kapitál dezenvolvimentu no transferénsia publika laiha (0).
Jornalista : Nelson de Sousa
Editór : Francisco Simões
