Ministru Justisa, Manuel Cárceres da Costa. Imajen Tatoli/Antonio Goncalves

DILI, 23 setembru 2020 (TATOLI)-Iha proposta orsamentu tetu fiskál ba tinan 2020 nian, Ministériu Justisa (MJ) prevee  millaun $11,609,323, hodi ezekuta  ba saláriu funsionáriu, ba servisu balun liga ba prizaun nian no mós sei selu retensaun ba projetu Servisu Nasional Kadastru (SNC), inklui servisu rutina sira seluk.

Notísia Relevante : Orgánika MJ foun atualizadu ho atribuisaun reforma judisiária

Montante orsamentu $11,609,323 ne’e atu koloka ba kategoria saláriu vensimentu $4,613,912, bens servisu $6,458,580, kapitál menór $342,830, kapitál dezenvolvimentu $194,000.

“Ita hatene katak hahú husi janeiru 2020 to’o mai agora, ita utiliza rejime duodesimu nune’e  tenke kontempla hotu iha OJE 2020.  Husi Ministériu Justisa iha plafond  millaun $11,609,323,” informa Ministru Justisa, Manuel Cárceres da Costa ba Agência Tatoli, ohin, hafoin hala’o audiénsia publika ho komisaun A Parlamentu Nasional hodi aprezenta proposta orsamentu Ministériu Justisa nian ba tinan fiskál OJE 2020 iha Parlamentu Nasionál.

Nia hatete, dotasaun orsamentu temporáriu (DOT) to’o ohin loron Ministériu gasta ona millaun $8 hela de’it millaun $3-resin iha proposta OJE 2020 hodi ezekuta.

“Ezekusaun DOT husi fulan janeiru to’o daudaun la’o di’ak konsege ezekuta  besik 70%,” Ministru Manuel Cárceres da Costa hateten.

Nia garante katak sei halo ezersísiu ba despeza sira bele sustenta atividade Ministériu Justisa to’o iha loron 31 dezembru 2020  ho di’ak.

Papél Ministériu Justisa (MJ) hanesan departamentu Governamentál responsavel ba konsesaun ezekusaun, koordenasaun no avaliasaun polítika, define no aprova husi Konsellu Ministru, ba area justisa, ba direitu no direitu umanu no Terras Propriedade (Artigo 2º do Decreto-Lei n.º 10/2019, de 14 juñu).

Tuir dokumentu orsamentál ne’ebé prevee iha livru  Planu Asaun Anuál (Livru 2) ba Ministériu Justisa (MJ) sei fó prioridade ba bem-estar sosiál, protesaun sosiál  no  sidadania, bem-estar sosiál (edukasaun no formasaun), sidadania (partisipasaun), konsolida no   fortalese justisa, demokrasia no direitu umanu, promosaun sosiedade  ho pasifika no  inkluziva (ODS 16).

Promosaun Estadu de Direitu, igualdade ba asesu rapidés no  efisiénsia prosimidade ba servisu ho  koezisténsia mekanizmu formal no informal (tradisionál)  justa ho fatór krusiál konfiansa.

Medida prinsipál setoriál  ba 2020 nian mak hanesan  promove asesu justisa, asegura normal funsionamentu no   mellora servisu Prizionál no  reinsersaun sosiál, promove direitu  umanu, fó kontinuidade   husi  dezenvolvimentu kadastru nasionál  terras no propriedade, halo levantamentu foun  no aumenta númeru parsela kadastru iha  territóriu nasionál.

Garante normal funsionamentu no  mellora servisu  rejistu, notariadu no identifikasaun sivíl, kontinua formasaun  ba majistradu, defensór públiku no  advogadu  privadu iha sentru formasaun  jurídika no judisiária, empodera  servisu judisiál.

Ikus liu mak mellora asesu justisa  ba populasaun  através husi julgamentu movies, divulgasaun ba  regulamentasaun lei, implementa polítika jéneru, konsentra atribuisaun hotu husi Governu iha matéria  reforma judisiária, no  promove boa governasaun no jestaun institusionál iha ministériu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here