Komísariu CAC, Sergio Hornai. Imajen Tatoli/Egas Cristóvão

DILI, 24 setembru 2020 (TATOLI)-Komisaun Anti-Korrupsaun (CAC, sigla portugés) presiza osan ho montante $1,071,547  hodi aposta iha proposta Orsamentu Jerál Estadu (OJE) 2020 atu finansia programa prioridade sira, liuliu halo ajustamentu preparativus ba implementasaun lei Medida Preventiva Kombate Korrupsaun (MPCC-sigla portugés).

Notísia Relevante : PN-Governu presiza serbisu hamutuk apoia CAC implementa lei MPCC

“CAC prevee $1,071,547   hodi ezekuta  ba planu kurtu prazu  ba implementasaun  lei MPCC ne’ebé efeitu nia vigor iha tinan oin,” informa  Komisáriu CAC Sergio Hornai, ba Agência Tatoli, ohin, bainhira  hala’o audiénsia públika ho Komisaun A Parlamentu Nasional hodi aprezenta proposta OJE CAC nian ba tinan fiskál 2020.

Sergio Hornai  hateten, sei ezekuta de’it ba internalize implementasaun lei MPCC   atu halo rekrutamentu ba asesór internasionál no funsionáriu atu hala’o servisu, hala’o baseline planu estratéjiku ba CAC  ne’ebé   antes ne’e la’o ona hodi kontinua bele finaliza, prepara oinsá kria prosedimentu no halo esplikasaun ba deklarante sira atu bele komprende no kumpre presta deklarasaun ezerse sira-nia funsaun  ba deklarasaun bens no movies ba kargu xefia iha autoridade públiku ka Estadu nian no sei hala’o semináriu ba disemina lei MPCC.

Proposta orsamentu CAC ho montante $1,071,547  kobre ba item saláriu vensimentu $773,107, bens servisu  298,441, kapitál menor, kapital dezenvolvimentu no transferensia públika laiha (0).

Sergio Hornai hateten, ezekusaun Dotasaun Orsamentu Temporáriu (DOT) ne’ebé Ministériu Finansas atribui ba CAC dezde inísiu janeiru to’o daudaun  nia ezekusaun mensalmente la’o di’ak. Tanba ne’e, nia dehan,  proposta OJE 2020 hala’o ajustamentu de’it  hodi hala’o programa sira  ba tempu besik.

CAC iha nia papél prosede  asaun prevensaun no  investigasaun kriminál ba krime korrupsaun ho kualkér forma, pekulatu, abuzu  podér, tráfiku influensia no  partisipasaun ekonomia  iha negósiu, ne’ebé definidu iha   lejizlasaun  penal (Artigu 4º da Lei n.º 8/2009, de 15 de jullu).

Tuir dokumentu livru Planu Asaun  Annual númeru prioridade prinsipál  medida setoriál  iha 2020, CAC prioritiza maka promove asaun  ho prevensaun, sensibilizasaun no  investigasaun kriminál ba   krime korrupsaun  iha kualkér forma,  rekolla no   analiza informasaun relativa ba  kauza   prevensaun  korrupsaun,  realiza asaun   sensibilizasaun destina   hodi limita  prátika aktu korrupsaun, motiva ema   adota prekausaun  redús  aktu  situasaun   ne’ebé fasilita okorensia  konduta krime,

CAC mós akonsella  kualkér instituisaun ka   entidade públika kona-ba forma prevensaun kombate konduta korrupsaun, promove asesu justisa, promove boa governasaun,  jestaun institusionál no fortalese kapasidade  rekursu umanu.

Jornalista       : Nelson de Sousa 

Editór             : Francisco Simões

HAKEREK NO HATÁN

Please enter your comment!
Please enter your name here