Komandante Jerál PNTL, Komísariu Faustino da Costa. Imajen Tatoli/Egas Cristovão

DILI, 23 setembru 2020 (TATOLI)- Komandante Jerál Polisia Nasionál Timor-Leste (PNTL), Komisáriu Faustino da Costa, fó orientasaun ba ekipa investigasaun nasionál hodi halo investigasaun ba pesoál membru PNTL sira ne’ebé fó autorizasaun ba sira nia oan no família balun husi Organizasaun Persaudaraan Seti Hati Terate (PSHT) hodi hakat tama ilegál ba Atambua-Indonézia hodi sa’e sabuk no fila-fali mai subar aan iha uma.

Notísia Relevante : Iha Baucau, Ajente PNTL lori kilat ameasa Komandante PNTL 

“Loos duni katak, identifika  membru PNTL balun mós ninia oan mós hakat fronteira ilegálmente ba iha Atambua. Agora Komandu hasai ona despaixu ita prosesa  komandante no membru sira ne’ebé  sira nia oan rasik sai husi uma depois la iha informasaun ba komandu, ita lakohi atu akontese,” dehan Komisáriu Faustino ba jornalista, ohin, iha Komandu Jerál PNTL, Caicoli, Dili.

Komandante Faustino dehan, membru polísia sira ne’ebé fasilita tiha sira nia oan ba Indonézia fila fali mai subar sira nia oan iha uma no lakohi koopera ho PNTL hodi haruka sira nia oan ba hela iha kuarentena sei hetan sansaun dixiplinár tuir lei PNTL nian.

“Ida ne’e maka komete fali husi família PNTL nian, ne’e ha’u hanoin problema boot, komandu sei tau konsiderasaun sériu. Tanba iha mós medida prevensaun husi governu kona-ba Estadu Emerjénsia, agora se mak iha prosesu komandu sei haree tuir lei,” nia hateten.

Durante agostu too setembru nia laran, ekipa operasaun konjunta, PNTL, Unidade Patrullamentu Fronteira (UPF), Unidade Espesiál Polísia (UEP), Unidade Polísia Marítima (UPM) no F-FDTL halo detensaun ba membru PSHT kuaze 100-liu ne’ebé hela provizóriu iha kuarentena Batugade no Colmera Dili hodi evita COVID-19.

Ema hirak ne’e, hafoin kumpre kuarentena durante loron 14, PNTL sei halo investigasaun no prosesa autór ne’e ba Ministériu Públiku, tanba kontra regra Estadu Emerjénsia.

Prezidente Repúblika, Francisco Guterres Lú Olo rasik dekreta ona Estadu Emerjénsia (EE) hodi husu atensaun ba povu atu halo viajen ilegál tama ba Atambua Indonézia hodi evita propagasaun surtu COVID-19.

Jornalista   : Eugénio Pereira

Editór        : Francisco Simões

1 KOMENTÁRIU

  1. Lei ida kona-ba Arma Branka ho Arte Marsial nian ne’e ninia aplikasaun nakonu ho politizasaun. Lei ne’e ko’alia klaru kona-ba sansaun saida de’it maka atu fo ba ema ne’ebe viola lei ne’e. Maibe, karik ita haree didi’ak, lei ne’e dala barak liu maka la aplika, tanba ne’e kontinua mosu violasaun, aat liu tan maka individu barak iha instituisaun Estadu nian sira mos fasilita ema hodi viola lei ne’e, ezemplu maka buat ne’ebe hateten iha notisia ne’e. Se nune’e bafatin, ita-nia nasaun sei sai aat.

HAKEREK NO HATÁN

Please enter your comment!
Please enter your name here