Imajen ilustrasaun/Google

DILI, 23 setembru  2020 (TATOLI)- Komandu Jerál Polísia Nasionál Timor-Leste (PNTL) hatún ona ekipa investigasaun hodi ba Baucau halo investigasaun profunda ba Ajente  Polísia Munisípiu Baucau nian ida ho inisiál LB ne’ebé ameasa no lori kilat atu tiru Komandante Polísia Baucau, Superintendente Xefe, Armando Monteiro, segunda foin lalais ne’e.

Komandante Jerál PNTL, Komísariu Faustino da Costa. Imajen Tatoli/Egas Cristovão

Komandante Jerál PNTL, Komisáriu Faustino da Costa, deklara nia parte sente hakfodak bainhira rona informasaun ne’e segunda (21/09)  no  iha loron tuir mai tersa (22/09), nia ho ekipa investigasaun nasionál halo kedas vizita urjente ba Baucau halo enkontru jerál ho Komandante Armando Monteiro, komandante eskuadra no membru sira hotu.

Faustino klarifika problema ne’e mosu, tanba Ajente  PNTL sira la simu desizaun Komandu PNTL atu muda sira ba idak-idak nia suku hodi hala’o knaar nu’udar Ofisiál Polísia Suku (OPS).

“Ha’u simu informasaun ne’e iha loron 21 liubá, ha’u kontaktu kedas Komandante Munisípiu Baucau hodi fó informasaun tanba saida maka buat ne’e mosu,” haktuir Komandante Faustino da Costa, ba jornalista sira, ohin, iha Kuartél Jerál PNTL, Caicoli, Dili.

Komandante Polísia Munisípiu Baucau, Superintendente Xefe, Armando Monteiro. Imajen Tatoli/Eugénio Pereira

Resposta ba pergunta komandante Faustino nian ne’e, Armando Monteiro, dehan, nia hasai duni orden ba ema sira ne’ebé halo servisu atu koloka ba Ofisiál Polísia Suku (OPS) ne’ebé prioridade tebes. ho nune’e, mosu dezentendimentu kedas.

“Kuandu komandante hasai despaixu, maibé tanba nia asuntu familiar nia Ajente Polísia LB teri netik, tanba nia señora tenke hetan operasaun iha ospitál, depois sira rua kontaktu malu liu hosi telefone iha liafuan balun sai problema,” haktuir Komandante Faustino da Costa.

Komisáriu Faustino rasik husu ba komandante eskuadra sira atu tuur rezolve no husu atu membru sira provizóriu labele uza arma hodi evita problema ruma.

Komandante Faustino mós rejeita informasaun ne’ebé sirkula iha rede sosiál katak, Ajente Polísia LB ameasa atu lori granada harahun Eskuadra Komandu PNTL Munisípiu Baucau.

Tuir nia, granada ne’e so Instituisaun F-FDTL no PNTL de’it maka iha no kualkér ema sivíl ka oknum PNTL sei la lori granada arbiru.

“Agora foto ida ne’ebé ajente ne’e ninian (lori) hela kilat tau iha Facebook, ne’e foto antigu iha ninia Facebook. Agora tuir relatóriu husi komanda Baucau ninia  administrasaun katak, orden komandu nian ne’ebé fó membru sira la uza arma durante 24. Agora situasaun dehan atu harahun Komandu PNTL Baucau ne’e, ha’u hanoin kala emosaun pesoál ida, ne’e sei la akontese,” dehan Faustino da Costa.

Faustino rekoñese, membru ne’e halo dezobediénsia hasoru Komandante Armando Monteiro, maibé nu’udar Komandante sei rona relatóriu investigasaun husi membru no Komandante Armando foin bele tetu hodi foti desizaun tuir lei dixiplinár PNTL nian.

Faustino rekoñese, nia membru ne’e konversa ho komandante Armando ho linguajen ladún di’ak tanba emosionál. Maibé situasaun ne’e agora komesa di’ak, tanba Komandante Armando rasik hatudu profisionalizmu hodi rezolve problema ho di’ak.

Oras ne’e daudaun Komandu PNTL liuhosi Seksaun Dixiplinár PNTL, PROFOS, Servisu Informasaun Polísia (SIP) no ekipa investigasaun kontinua halo prosesu investigasaun  durante  loron 15 hodi entrega ba Komandu Jerál PNTL.

Iha parte seluk, Ajénsia Tatoli konfirma ho Komandante PNTL Baucau, Superintendente Xefe, Armando Monteiro, labele fó komentáriu, tanba aprezenta ona relatóriu ba Komandu Jerál PNTL.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here