Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (23/09). Imajen Tatoli/Egas Cristovão

DILI, 23 setembru 2020 (TATOLI)-Iha reuniaun ezekutivu sira iha kuarta ne’e, Governu propoin Prezidente Repúblika (PR), Francisco Guterres Lú Olo, atu dekreta Estadu Emerjénsia (EE) daneen ba loron-30.

EE dalimak hahú vigora hahú tuku 00:00 loron 05 setembru to’o tuku 23:59 loron 04 outubru 2020.

“Pedidu dekreta Estadu Emerjénsia tanba haree ba mudansa situasaun epidemiolójika no proliferasaun ba kazu rejistadu COVID-19 iha nível rejionál no mundiál, tanba ne’e atu evita no netraliza risku propagasaun SARS-CoV-2,” relata Ministru Prezidénsia Konsellu Ministru, Fidelis Manuel Leite Magalhães, hafoin ramata reuniaun Konsellu Ministru iha Palásiu Governu.

Notísia Relevante: Prezidente Repúblika dekreta ona EE dalimak

Estensaun EE ne’e hodi proteje saúde públika no kapasidade resposta ba Sistema Nasionál Saúde, tanba ne’e Governu propoin ba Xefe Governu halo estensaun hodi permite suspende ka restrinje direitu tomak kona-ba sirkulasaun internasionál no fiksasaun rezidénsia no rezisténsia.

Daudaun ne’e totál kazu konfirmadu COVID ne’ebé rejista iha Timor-Leste hamutuk na’in-27 no provável hamutuk haat maibé rekuperadu hotu ona no to’o ohin loron seidauk rejista kazu foun.

Ema ne’ebé kumpre ona konfinamentu obrigatóriu hamutuk 680 no auto kuarentena hamutuk 174, enkuantu ema ne’ebé pasa ona kuarentena hamutuk 4.229.

Totál kazu rejistadu iha Indonézia, ne’ebé hanesan nasaun viziñu hamutuk 252.923 no hosi númeru ne’e na’in 9.837 makalakon ona vida tanba moras ne’e no rekuperadu hamutuk 184.000.

Xefe Estadu dekreta EE faze dahuluk ba loron-30, ne’ebé hahú entra ein vigór iha 28 marsu hahú oras 00:00 to’o 26 abríl 2020 oras 23:59, atu fó dalan ba Governu implementa médida espesífiku sira hodi prevene propagasaun COVID-19.

Haree ba nesesidade atu estende, Xefe Estadu promulga estensaun EE períodu daruak ho durasaun loron-30 tuir pedidu Govenu.

Nune’e, iha loron 27 abríl, Prezidente Repúblika liuhosi Dekretu Prezidensiál númeru 32/2020 promulga estensaun EE períodu daruak ho durasaun loron-30, hahú husi oras 00.00 loron 28 abríl to’o oras 23:59 27 maiu 2020.

EE ba períodu datoluk implementa iha oras 00:00 loron 28 maiu to’o oras 23:59 loron 26 juñu 2020.

Enkuantu, EE dahaat hahú hosi oras 00.00 iha loron 06 agostu 2020 to’o oras 23.59 iha loron 4 setembru 2020 durante loron 30 ba zona iha fronteira, aeroportu no portu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here