Prezidente Repúblika, Francisco Guterres 'Lú Olo'. Imajen Tatoli/António Gonçalves

DILI, 03 setembru 2020 (TATOLI)—Prezidente Repúblika, Francisco Guterres Lú Olo, dekreta ona Estadu Emerjénsia Dalimak durante loron 30.

Xefe Estadu dekreta EE ne’e horisehik, 03 setembru 2020 hafoin hetan autorizasaun hosi Parlamentu Nasionál.
Renovasaun estadu ermerjénsia ho durasaun loron tolu-nulu (30), hahú husi tuku 00:00 iha 5 setembru 2020 (sábadu) no termina iha tuku 23:59 iha 4 outubru 2020 (domingu). Deklarasaun estadu emerjénsia abranje territóriu nasionál tomak.

Notísia Relevante: Konsellu Superiór Defeza no Seguransa konkorda estensaun Estadu Emerjénsia

“Estadu emerjénsia nu’udar medida prevensaun no kontrolu atu hases sidadaun hotu-hotu iha Timor-Leste hosi kalamidade públika ne’ebé bele mosu husi COVID-19. Estadu tetu risku ne’ebé asosiadu ho SARS-CoV-2 ba Timor-Leste no medida ne’ebé tenke foti atu prevene importasaun moras hosi rai-seluk, liuliu hosi nasaun ne’ebé iha relasaun besik liu ho Timor-Leste,” komunikadu imprensa ne’ebé Agência TATOLI, asesu hosi Palásiu Prezidensiál Nicolau Lobato, Bairru Pite, kinta ne’e.

Ba prevensaun no kontrolu ba COVID-19, Estadu sei tau atensaun espesiál ba ninia fronteira sira, hanesan pontu entrada mai territóriu nasionál no impoin kuarentena ba suspeitu ho infesaun no izolamentu ba ema hirak ne’ebé hetan moras no sai suspeitu. Ho medida sira ne’e mak sei bele proteje populasaun hotu-hotu. Lahó medidas hirak ne’e situasaun País ninian bele oin-seluk no potensialmente sai difísil liu.

Estadu foti medida sira ne’e atu proteje saúde públika, husi parte seluk, implementasaun estadu emerjénsia sei limite sidadaun ida-idak nia direitu no liberdades ne’ebé Konstituisaun garante.

Estadu emerjénsia ne’e sei parsialmente suspende no limita direitu ba sirkulasaun internasionál, liberdade sirkulasaun no fixasaun rezidénsia iha territóriu nasionál no mós direitu ba rezisténsia.

Ohin, Parlamentu Nasionál aprova mensajen Prezidente Repúblika atu deklara estadu emerjénsia.

Molok haruka mensajen ba Parlamentu Nasionál Prezidente Repúblika rona uluk hanoin sira husi Konsellu Estadu no Konsellu Superior Defeza no Seguransa kona-ba pedidu renovasaun estadu emerjénsia husi Governu.

Governu nia pedidu ba renovasaun estadu emerjénsia tanba haree ba númeru kazu konfirmadu iha infesaun ho SARS-COV2, tuir dadus husi Organizasaun Saúde Mundiál, iha loron 25 agostu 2020, hamutuk liu 23 miloins no husi númeru ne’e hamate ona ema 800 mil mundialmente desde inísiu pandemia.

Númeru kazu ho COVID-19 iha paises viziñu ho Timor-Leste, nomeadamente Indonézia no Austrália aumenta babeibeik. Iha Indonézia, ne’ebé Timor-Leste fahe nia fronteira terrestres rejista kazu hamutuk 155412 no iha Austrália hamutuk 24916, tuir dadus husi Organizasaun Saúde Mundiál. Tanba ne’e, renovasaun estadu emerjénsia nu’udar medida ida hodi prevene no kontrolu COVID-19 atu hases sidadaun hotu-hotu husi kalamidade públika.

Jornalista: Evaristo Soares Martins

Editór: Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here