Komandante Centro Formasaun Akademia, Superintendente Xefe, Arqumino Ramos ho Magnífiku Reitór UNPAZ, Adolmando Amaral, halo termu entrega akordu kooperasaun. Imajen/Eugénio Pereira

DILI, 08 jullu 2020 (TATOLI)- Komandu Polísia Nasionál Timor-Leste (PNTL) liuhosi Centro Formasaun Polisia (CFP) ho Universidade da Paz (UNPAZ), ohin, asina akordu kooperasaun hodi fó formasaun ba dosente UNPAZ.

Akordu kooperasaun ne’e asina direita hosi Komandante Centro Formasaun Akademia, Superintendente Xefe, Arqumino Ramos ho Magnífiku Reitór UNPAZ, Adolmando Amaral, akompaña hosi Segundu Komandante Jerál PNTL, Komisáriu Mateus Fernandes.

Komisáriu Mateus Fernandes lori Komandu PNTL nia naran hato’o agradese ba parseiru sira no ba  kooperasaun entre CFP no UNPAZ hodi koordena malu para fasilita formasaun rekursu umanu ho objetivu dezenvolve rekursu dosente sira iha UNPAZ  no membru PNTL hetan bolsa estudu hosi UNPAZ atu prepara ema sai matenek dezenvolve PNTL.

Nia dehan, daudaun ne’e Komandu PNTL aprezenta ona estatutu PNTL ba Konsellu Ministru kuandu aprova ona, CFP sei harii Akademia Polísia hodi fó formasaun ba autoridade suku no dosente universitáriu sira.

“Estatutu PNTL ne e  kuandu aprova, sei harii akademia polísia ne’ebé ho diploma trés ne’ebé ligasaun ho dezafiu no dinámiku sosiál atu dezenvolve PNTL,” hateten Komandante Mateus Fernande iha nia diskursu iha ámbitu serimónia asina akordu entre parte rua  iha Centro Formasaun Polísia iha  Comoro, Dili.

Iha fatin hanesan Magnífiku Reitór UNPAZ, Adolmando Amaral hato’o agradese tanba bele  estabelese kooperasaun ho PNTL hodi fó formasaun ba dosente UNPAZ no UNPAZ rasik ba tinan ne’e fó bolsu estudu ba membru PNTL na’in haat (4).

 “UNPAZ agora organiza aan atu servisu hamutuk ho instituisaun Estadu no privadu sira, no ohin ita asina akordu ho CFP para depois iha área formasaun no kapasitasaun ba dosente sira,” hateten Adolmando Amaral.

Bolsu estudu ne’ebé UNPAZ oferese tinan ne’e ba membru PNTL na’in haat ba nivel lisensiatura na’in-rua no nivel mestradu na’in-rua.

Kona-ba prosesu selesaun ba membru PNTL sira atu asesu ba bolsu estudu ne’e parte UNPAZ entrega tomak ba CFP maka halo selesaun ba membru PNTL sira ne’ebé tuir formasaun iha CFP hetan valór di’ak iha sira nia formasaun bele kontinua sira nia estudu iha universidade.

 Reitór UNPAZ hatutan, akordu ne’ebé asiona ona hosi parte rua importante tebes, tanba UNPAZ hakarak dosente hotu tenke hetan formasaun hodi gaña esperiénsia ho formasaun oin-oin.

Biban ne’e Komandante Centro Formasaun Polísia  (CFP), Superintendente Arqumino Ramos dehan, agora daudaun sira nia parte koordena ho INDIMO-SEFOPE hodi halo avaliasaun oinsá maka fó kursu formasaun ba membru PNTL no dosente sira hosi UNPAZ.

“Ita prepara kursu ba formasaun dosente nian iha avaliasaun hosi UNDIMO iha tempu badak ida hahú formasaun hodi membru sira tuir kursu,” dehan Arqumino.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here