Ajente Polísia, Lamberto Boavida. Imajen Facebook/Maxi

DILI, 23 setembru 2020 (TATOLI)-Membru Polísia Nasionál Timor-Leste (PNTL), Ajente Lamberto Boavida, klarifika katak, nia iha duni dezentendimentu ho Komandante Polísia Munisípiu Baucau, Superintendente Xefe Armando Monteiro, liuhusi komunikasaun telefónika, maibé la iha intensaun direita no indireta halo ameasa ba Komandante Armando Monteiro ho kilat ka ameasa atu soe granada ba Kuartél Polísia Baucau.

Notísia Relevante : Iha Baucau, Ajente PNTL lori kilat ameasa Komandante PNTL

Ajente Polísia, Lamberto  Boavida, rekoñese, iha duni diskusaun no dezentendimentu ho ninia Komandante Polísia Armando Monteiro, tanba de’it desizaun balun. Maibé, nia la ameasa Komandante Armando Monteiro atu tiru ho kilat ka atu soe granada ba Kuartél PNTL Baucau.

 “Ha’u mós sente hafodak ho informasaun ne’ebé fó sai husi pájina Facebook Fuan Domin katak, ha’u halo ameasa ba Komandante Armando no akuza ha’u lori arma no lori fali granada ba tuda rahun PNTL ne’e laloos. Tanba granada ne’e so Instituisaun F-FDTL de’it maka iha. Tanba ne’e ha’u mós sente hafodak bainhira ha’u nia konversa ho komandante ne’e nu’udar aman no oan nusa maka tenke  lansa fali iha Facebook,” hateten Ajente Lamberto Boavida, ba Agência Tatoli via telefone, ohin.

Nia dehan, dezentendimentu entre nia ho komandante Armando mosu, tanba sira membru PNTL kuaze na’in-30 sente hafodak bainhira Komandante Armando hasai despaxu iha loron 18 setembru 2020 liubá, hodi muda sira ba idak-idak ba sira-nia suku atu hala’o knaar nu’udar Ofisiál Polísia Suku (OPS) ho razaun ne’ebé la klaru no komandante rasik seidauk halo esplikasaun ba sira kona-ba desizaun muda ne’e.

“Ha’u telefone duni komandante Armando mosu duni dezentendimentu, maibé ida ne’e hanesan aman no oan, ami husu atu komandante nu’udar ami nia aman no ami nia maun atu klarifika de’it desizaun muda ami kuaze na’in-30 ne’e. Tanba presiza hatene informasaun ita muda ba fatin seluk, se povu ne’e husu, ita bele halo klarifika ba povu bele intende,” nia hateten.

Nu’udar juventude rezisténsia ne’ebé kontribui mós ba luta Independénsia Timor-Leste, Ajente Polísia Lamberto Boavida dehan, hafoin mosu dezentendimentu ne’e, sira rasik halo kedas enkontru ho Komandante Armando Monteiro, inklui Komandante Jerál PNTL, Komisáriu Faustino da Costa, hodi rezolve problema no prontu simu orden husi komandante Jerál PNTL no Komandu PNTL Baucau.

“Iha altura ne’ebá ami halo kedas enkontru ho komandante Armando akompaña mós ho Komandante Jerál, ami rasik deklara prontu simu orientasaun hodi hala’o knaar tuir orden. Agora akuza fali dehan ami ameasa ne’e laloos, tanba rai Timor ne’e lulik, ita hotu- hotu luta no terus mós ba rai ida ne’e hakarak lori nasaun, liu-liu Instituisaun PNTL ba oin,” Lamberto Boavida hateten.

Nia hatutan, too agora sira nia koordenasaun ho komandante Armando la’o di’ak nafatin no sira rasik prontu koopera ho ekipa Investigasaun no PROFOS-PNTL hodi foti sira nia deklarasaun hodi rezolve problema.

“Ami hein hela ekipa investigasaun nasionál para fó deklarasaun hodi klarifika informasaun sira ne’ebé loos, hodi ita bele hetan justifikasaun no informasaun ne’ebé klaru,” nia hatutan.

Komandante Polísia Munisípiu Baucau, Superintendente Xefe, Armando Monteiro. Imajen Tatoli/Eugénio Pereira

Komandante PNTL Baucau, Superintendente Xefe, Armando Monteiro deklara, razaun  muda membru sira ne’e ba OPS atu hakbesik liután ba komunidade tuir polítika Komandu Jerál PNTL no Governu nian hodi lori PNTL hakbesik ba povu hodi garante di’ak estabilidade seguransa iha territóriu nasionál.

Armando dehan, hafoin assume knaar nu’udar Komandante PNTL Munisípiu Baucau, nia rasik observa Baucau ho Postu Administrativu neen (6), Laga, Quelecai, Baguia, Baucau Vila, Venilale no Vemasse ne’ebé iha suku 59 presiza tebes OPS nia prezensa.

“Ha’u mai implementa programa prioridade rua husi Governu nian ne’ebé fó mai PNTL atu dezenvolve Polisiamentu Komunitáriu tantu mós Seguransa Rodoviáriu nian. Tanba Baucau suku 59 ne’e iha suku 45 mamuk hela, tanba ne’e koloka membru sira ne’e ba suku idak-idak atu responde tuir planu estratéjiku Governu nian kona-ba polisiamentu komunitáriu,” hateten Armando Monteiro.

Kona-ba informasaun katak, oknum PNTL lori kilat atu tiru ne’e, Armando rejeita atu fó deklarasaun, tanba prosesu kazu ne’e entrega ona ba Komandu Jerál PNTL maka sei halo investigasaun hodi rezolve dezentendimentu ne’e.

Jornalista : Eugénio Pereira

Editór       : Francisco Simões

2 KOMENTÁRIU

HAKEREK NO HATÁN

Please enter your comment!
Please enter your name here